​भक्तपुर, असोज २८ गते।
सूर्यविनायक नगरपालिका वडा नं. १ सिरुटारमा साढे चार तले नयाँ वडा प्रशासनिक भवनको निर्माण कार्य सुरु भएको छ। नगरप्रमुख वासुदेव थापाले बुधबार आयोजित एक कार्यक्रमका बीच भवन निर्माण कार्यको शिलान्यास गर्नुभएको हो।
​लामो समयदेखि उपयुक्त जग्गाको अभावका कारण वडा कार्यालयको आफ्नै प्रशासनिक भवन निर्माण हुन नसकेको अवस्थामा स्थानीय जग्गादाता परिवारबाट पाँच आना जग्गा प्राप्त भएपछि भवन निर्माणको प्रक्रिया अघि बढेको हो।
​सो अवसरमा वडा प्रशासनिक भवन निर्माणका लागि जग्गा उपलब्ध गराउनुहुने स्वर्गीय नरबहादुर राउतकी बुहारी तथा स्वर्गीय चित्रबहादुर राउतकी धर्मपत्नी गोमा राउत र उहाँका छोराहरू नवराज राउत, रामकृष्ण राउत, श्यामकृष्ण राउत र दीपक राउतलाई सार्वजनिक सेवाका लागि पुर्‍याउनुभएको योगदानको कदर गर्दै सम्मान गरिएको थियो।
​शिलान्यास कार्यक्रममा नगरप्रमुख थापाले नयाँ प्रशासनिक भवन निर्माण भएपछि नागरिकलाई सहज, व्यवस्थित र प्रभावकारी रूपमा सेवा प्रवाह गर्न सहयोग पुग्ने बताउनुभयो। उहाँले निर्माण कार्य निर्धारित समयभित्रै सम्पन्न गर्न निर्माण व्यवसायीलाई आग्रह गर्दै नगरपालिकाका तर्फबाट आवश्यक सहजीकरण गरिने जानकारी दिनुभयो। भवन सार्वजनिक सम्पत्ति भएकाले यसको गुणस्तर कायम राख्न स्थानीयवासीले पनि निरन्तर निगरानी गर्नुपर्नेमा उहाँले जोड दिनुभयो।
​नगर उपप्रमुख सरिता तिमिल्सिना भट्टराईले आफ्नै प्रशासनिक भवन निर्माण भएपछि वडाबाट प्रदान गरिने सेवा थप व्यवस्थित र प्रभावकारी हुने विश्वास व्यक्त गर्नुभयो। उहाँले सार्वजनिक हितका लागि जग्गा उपलब्ध गराउने गोमा राउतको परिवारको योगदानको प्रशंसा गर्दै भवन निर्माण कार्य समयमै सम्पन्न गर्न सबै पक्षको सहयोग आवश्यक रहेको बताउनुभयो।
​वडा नं. १ का वडाध्यक्ष सानुकाजी कायस्थले वडामा सार्वजनिक जग्गाको अभावका कारण आफ्नै प्रशासनिक भवन निर्माण गर्न लामो समयदेखि कठिनाइ हुँदै आएको बताउनुभयो। जग्गादाता परिवारले पाँच आना जग्गा उपलब्ध गराएपछि भवन निर्माणको बाटो खुलेको उल्लेख गर्दै उहाँले स्थानीयस्तरमा पूर्वाधार विकासका कामहरू तीव्र रूपमा अघि बढिरहेको जानकारी दिनुभयो। वडामा सडक, खानेपानी, पुल तथा अन्य पूर्वाधार निर्माणका कामलाई प्राथमिकताका साथ अघि बढाइएको उहाँले बताउनुभयो।
​सूर्यविनायक नगरपालिका वडा नं. २ का वडाध्यक्ष प्रदीप कार्कीले नयाँ भवन निर्माणले स्थानीय नागरिकलाई सेवा लिन सहज हुने बताउनुभयो। उहाँले सार्वजनिक पूर्वाधार निर्माणमा स्थानीय समुदायको सहयोग र सहकार्य महत्त्वपूर्ण हुने उल्लेख गर्नुभयो।
​नगरपालिकाका पूर्वाधार विकास शाखा प्रमुख इन्जिनियर जनक न्यौपानेका अनुसार वडा प्रशासनिक भवन निर्माणका लागि करिब दुई करोड ४० लाख रुपैयाँमा ठेक्का सम्झौता भई निर्माण कार्य अघि बढाइएको हो। उहाँले निर्माण हुने भवन अपाङ्गमैत्री तथा बालमैत्री हुने जानकारी दिँदै सम्झौताअनुसार निर्माण सम्पन्न गर्ने अवधि आर्थिक वर्ष २०८४ सम्म रहे पनि निर्माण कार्यलाई तीव्रता दिई आगामी छ महिनाभित्रै सम्पन्न गर्ने लक्ष्य राखिएको बताउनुभयो।
​नगरपालिकाका प्रमुख प्रशासकीय अधिकृत युवराज आचार्यका अनुसार नगरपालिकाका १० वडामध्ये ९ वटा वडा कार्यालयका आफ्नै भवन निर्माण सम्पन्न भइसकेका छन्। सिरुटारमा नयाँ भवन निर्माण सम्पन्न भएपछि नगरपालिकाका सबै १० वटै वडा कार्यालय आफ्नै प्रशासनिक भवनबाट सञ्चालन हुनेछन्। नगरपालिकाले वडा कार्यालयका भवनसँगै नगर अस्पताल तथा स्वास्थ्य चौकीहरूबाट समेत आफ्नै भवनमार्फत सेवा प्रवाह गर्दै आएको छ।
​स्थानीय तहमा नागरिकलाई सहज, सरल र प्रभावकारी सेवा उपलब्ध गराउन आवश्यक पूर्वाधार निर्माण महत्त्वपूर्ण मानिन्छ। सिरुटारमा नयाँ वडा प्रशासनिक भवन निर्माण सुरु भएसँगै स्थानीयवासीले पनि थप व्यवस्थित सेवा पाउने अपेक्षा गरेका छन्।

The post सूर्यविनायक वडा नं. १ को साढे चार तले प्रशासनिक भवनको नगरप्रमुख थापाद्वारा शिलान्यास appeared first on Jana Aawaj News.

नारायण थापा

नुवाकोट, असोज २२ गते । परमेश्वरको मण्डली विश्व सुसमाचार समाजले भोटेकोशी नदीमा आएको बाढीबाट प्रभावित रसुवा र नुवाकोटका बासिन्दाका लागि आपत्कालीन राहत सामग्री सहयोग गरेको छ।

मण्डलीले बाढीपीडितका लागि नुवाकोटको विदुरस्थित जिल्ला प्रशासन कार्यालयमार्फत राहत सामग्री हस्तान्तरण गरेको हो। राहत सामग्रीमा १५ हजार २५० किलो चामल, ६ हजार १२५ किलो दाल र २ हजार लिटर खाने तेल रहेका छन्।

कार्यक्रममा जिल्ला प्रशासन कार्यालयका प्रशासकिय अधिकृत होमनाथ दाहालले परमेश्वरको मण्डली विश्व सुसमाचार समाजले आज बाढीबाट प्रभावित परिवारको लागि आज राहत स्वरुप चामल, दाल र तेल हस्तान्तरण गर्नुभएको छ । हाल दशैको समयमा खाद्यान्न अभाव भएको उचित समयमा राहत वितरण गर्नुभएको छ । राहत वितरण गर्न यहाँसम्म आउनुभएको सबै परमेश्वरको मण्डली विश्व सुसमाचार समाजका सबै सदस्यहरुलाई धन्यवाद दिनुभयो ।

यस्तैगरी कार्यक्रममा पुर्वधार विकास कार्यालय नुवाकोटका इन्जिनियर रबिन खातीले परमेश्वरको मण्डली विश्व सुसमाचार समाजले आज बाढी पिढितका लागि खाद्यान्न ल्याउनुभएको छ, यसले खाद्यान्नको अभाव भएको यस जटिल अवस्थामा राहत वितरण गर्नुभएकोमा मणडलीलाई धन्यवाद व्यक्त गर्नुभयो ।

कार्यक्रममा विदुर नगरपालिका वडा नम्बर ४ का निलम बाबु ढुङ्गेल अध्यक्ष   ले परमेश्वरको मण्डली विश्व सुसमाचार समाजले आपत्कालिन अवस्थामा राहत आएको थियो हाल दाताहरुको कमिले खाद्यान्नको चरम अभाव भएको अवस्थामा तपाईहरुले आज खाद्यान्न ल्याईदिनुभयो । आज मात्र नभएर अन्य समयमा पनि सहयोगको अपेक्षा राखेका छौ आउने दिनहरुमा हाम्रो नगरपालिका र वडाको तर्फबाट गर्नुपर्ने सहयोगहरु गर्ने प्रतिबद्धता व्यक्त गर्नुभयो ।

बाढीबाट प्रभावित परिवारको दैनिक जीवनयापनमा सहयोग पुर्‍याउने तथा खाद्य आवश्यकतालाई केही हदसम्म सम्बोधन गर्ने उद्देश्यले राहत सामग्री उपलब्ध गराइएको मण्डलीले जनाएको छ।

गत भदौ १० मा आएको भोटेकोशी बाढीका कारण रसुवा, नुवाकोटलगायत नदी तटीय क्षेत्रमा मानवीय तथा भौतिक क्षति भएको थियो। बाढीका कारण घर, सडक, पुल तथा अन्य आधारभूत संरचनामा क्षति पुगेको थियो। सरकारको प्रारम्भिक सर्वेक्षणअनुसार करिब ७ हजार ५७० घरमा क्षति पुगेको र करिब ३२ हजार ९०० जना प्रभावित भएको उल्लेख गरिएको छ।

मण्डलीका अनुसार उक्त राहत सहयोग जलवायु उत्थानशीलताका लागि सञ्चालन भइरहेको ‘Build Hope!’ अभियानअन्तर्गत गरिएको हो। अभियानले बाढी, भारी वर्षा, अत्यधिक गर्मीलगायत जलवायुजन्य विपद्बाट प्रभावित समुदायलाई तत्काल सहयोग गर्नुका साथै विपद्को जोखिम न्यूनीकरण र स्थानीय समुदायको जलवायु उत्थानशीलता बढाउने उद्देश्य राखेको छ।

मण्डलीका एक प्रतिनिधिले विपद्का कारण परिवार तथा जीवनयापनको आधार गुमाएर कठिनाइमा रहेका प्रभावितप्रति सहानुभूति व्यक्त गर्दै राहत सहयोगले उनीहरूको दैनिक जीवन पुनःस्थापना गर्न केही भए पनि सहयोग पुग्ने विश्वास व्यक्त गरे। आगामी दिनमा पनि स्थानीय समुदायसँग सहकार्य गर्दै विपद्बाट प्रभावित नागरिकलाई आवश्यक सहयोग गर्ने प्रतिबद्धता उनले जनाए।

राहत सामग्री हस्तान्तरण कार्यक्रममा सहभागी मण्डलीका विश्वासीहरूले पनि बाढीपीडितहरू छिट्टै सामान्य दैनिक जीवनमा फर्कन सकून् भन्ने कामना गरेका थिए।

परमेश्वरको मण्डलीका विश्वासीहरूले नेपालमा यसअघि पनि आपत्कालीन राहत, रक्तदान, वातावरण सरसफाइ तथा पुनःस्थापनालगायत विभिन्न सामाजिक सेवाका गतिविधि सञ्चालन गर्दै आएको जनाइएको छ। सन् २०१५ को विनाशकारी भूकम्पका समयमा खाद्यान्न तथा दैनिक उपभोग्य सामग्री सहयोग गर्नुका साथै प्रभावित क्षेत्रको पुनःस्थापना र भूकम्पबाट क्षतिग्रस्त विद्यालयहरूको पुनर्निर्माणमा समेत सहयोग गरेको मण्डलीको भनाइ छ।

मण्डलीका अनुसार नेपालमा हालसम्म ७२ हजार ६८८ जनाले १ हजार ८४ वटा सामाजिक सेवाका गतिविधिमा सहभागिता जनाएका छन्। मानवीय तथा सामाजिक सेवाका गतिविधिका लागि बागमती प्रदेशको सामाजिक विकास मन्त्रालय, बुढानीलकण्ठ नगरपालिका, नेपाल रेडक्रस सोसाइटीलगायत विभिन्न निकायबाट प्रशंसा तथा कदरपत्र प्राप्त भएको पनि मण्डलीले जनाएको छ।

मण्डलीले बागमती प्रदेशका भरतपुर र काठमाडौं, कोशी प्रदेशको सुन्दरहरैंचा, लुम्बिनी प्रदेशको नेपालगन्ज तथा कर्णाली प्रदेशको वीरेन्द्रनगरलगायत विभिन्न स्थानमा वातावरण सरसफाइ तथा समुदाय केन्द्रित सेवामूलक कार्यक्रम सञ्चालन गरेको जनाएको छ। त्यसैगरी स्थानीय समुदायमा रगतको अभाव कम गर्न नियमित रक्तदान कार्यक्रम पनि सञ्चालन गर्दै आएको छ।

मण्डलीका अनुसार ‘निस्तार-चाडको प्रेम, जीवन बचाउने प्रेम विश्वव्यापी रक्तदान कार्यक्रम’ अन्तर्गत नेपालमा हालसम्म ५४ पटक बृहत् रक्तदान कार्यक्रम आयोजना गरिएको छ।

परमेश्वरको मण्डलीको स्थापना सन् १९६४ मा दक्षिण कोरियामा भएको हो। मण्डलीका अनुसार विश्वका १७५ राष्ट्रका ७ हजार ८०० भन्दा बढी क्षेत्रमा करिब ४० लाख विश्वासी रहेका छन्। मण्डलीले सामाजिक सेवा, वातावरण संरक्षण, रक्तदान तथा विपद् राहतलगायत क्षेत्रमा विश्वव्यापी रूपमा विभिन्न गतिविधि सञ्चालन गर्दै आएको जनाएको छ।

मण्डलीका अनुसार यस्ता सामाजिक तथा मानवीय सेवाका लागि विभिन्न देशका सरकारी तथा गैरसरकारी निकायबाट ६ हजार २०० भन्दा बढी पुरस्कार तथा सम्मान प्राप्त भएका छन्।

The post परमेश्वरको मण्डलीद्वारा भोटेकोशी बाढीपीडितलाई आपत्कालीन राहत appeared first on Jana Aawaj News.

भक्तपुर । गत भाद्र १० गते बुधबार रसुवाको भोटेकोशी नदीमा आएको विनाशकारी बाढीले रसुवा, नुवाकोट, धादिङ र चितवन जिल्ला लगायत विभिन्न भागमा पुर्‍याएको मानवीय र भौतिक क्षतिप्रति वागीश्वरी परिवारले दुःख व्यक्त गदै विज्ञप्ति निकालेको छ ।
विज्ञप्ति मार्फत, प्राकृतिक विपदमा परी ज्यान गुमाउनु हुने मृतकहरुप्रति श्रद्धाञ्जली व्यक्त गर्दै घाइतेहरुको स्वास्थ्य लाभको कामना गरेको छ । यस विषम परिस्थितिमा प्रभावित नागरिकहरुका लागि राहत तथा पुनर्स्थापनाका लागि वागीश्वरी माध्यमिक विद्यालय, कलेज परिवारको तर्फबाट सोमबार सङ्कलित सहयोग रकम रु. ११ लाख ९५ हजार ३३३ रुपैया“ प्रधानमन्त्री दैवी प्रकोप उद्धार कोषमा दाखिला भएको जानकारी गराइएको छ ।
जसअन्तर्गत वागीश्वरी माध्यमिक विद्यालयबाट संस्थागत २ लाख, शिक्षक कर्मचारीहरुबाट ७ लाख २५ हजार ८२९ रुपैया“, विद्यार्थीहरुबाट ५४ हजार ४१८ रुपैया“, प्रा.डा. सिद्धिवीर कर्माचार्यबाट ४४ हजार ४४४ रुपैया“ गरी १० लाख २४ हजार ६९१ रुपैया“ रकम दाखिला भएको छ ।
वागीश्वरी कलेजबाट संस्थागत ५० हजार रुपैया“, शिक्षक कर्मचारीहरुबाट ६१ हजार ९ रुपैया“, विद्यार्थीहरुबाट ८ हजार गरी १ लाख १९ हजार ९ रुपैया“ रकम दाखिला भएको छ । त्यस्तै, वागीश्वरी कलेज अफ म्यानेजमेन्टको तर्फबाट संस्थागत २५ हजार रुपैया“, शिक्षक कर्मचारीहरुबाट १९ हजार ४५३ रुपैया“, विद्यार्थीहरुबाट सङ्कलित ७ हजार १८० रुपैया“ गरी जम्मा ५१ हजार ५३३ रुपैया“ रकम दाखिला भएको छ ।
दाखिला भएका भौचरहरुसहितको पत्र आज जिल्ला प्रशासन कार्यालय भक्तपुरका प्रमुख जिल्ला अधिकारी विनोद कुमार खड्कालाई विद्यालय व्यवस्थापन समितिका अध्यक्ष रविन्द्र ज्याख्वले हन्तान्तरण गर्नुभयो ।

The post वागीश्वरीले बाढी पीडितका लागि ११ लाख ९५ हजार ३३३ रुपैया“ सहयोग appeared first on Jana Aawaj News.

जन आवाज न्युज/भक्तपुर, साउन २२ गते । सूर्यविनायक नगरपालिका-७, गुण्डु सिलामगालस्थित मनोजकुमार तामाङको कुखुरा फार्ममा आज शुक्रबार बिहान ग्याँस हिटरबाट आगलागी हुँदा १ हजार ५ सय एकदिने कुखुराका चल्ला जलेर नष्ट भएका छन्।

आगलागीबाट कुखुरा फार्मको टहरा समेत जलेर पूर्ण रूपमा क्षति भएको छ। घटनास्थलमा जुद्ध बारुण यन्त्र कार्यालय भक्तपुरबाट गएको दमकलले करिब १ घण्टा ४० मिनेटको प्रयासपछि पौने छ बजेतिर आगलागी नियन्त्रणमा लिएको बताइएको छ ।

The post गुण्डूको कुखुरा फार्ममा आगलागी, पन्ध्र सय कुखुराका चल्ला जलेर नष्ट appeared first on Jana Aawaj News.

जन आवाज न्युज/मध्यपुर थिमी, भक्तपुर, साउन २२ गते । मध्यपुर थिमी नगरपालिकाको विकास निर्माण, उपलब्धि तथा भावी योजनाका विषयमा सञ्चारकर्मीहरूसँग विशेष अन्तरक्रिया कार्यक्रम सुरु भएको छ।

क्रियाशील पत्रकार मञ्च, भक्तपुरको आयोजना तथा मध्यपुर थिमी नगरपालिकाको समन्वयमा उक्त कार्यक्रम आयोजना गरिएको हो।

​यचु पार्टी भेन्युमा आयोजित कार्यक्रममा नगरभित्र भएका विकास निर्माणका कार्य, पुरातात्विक तथा सांस्कृतिक सम्पदाको संरक्षण, स्वास्थ्य, शिक्षा र पूर्वाधार विकासका क्षेत्रमा प्राप्त उपलब्धिको समीक्षा भइरहेको छ।

कार्यक्रममा नगरपालिकाका प्रतिनिधिहरूले नगरका प्रमुख उपलब्धिहरू प्रस्तुत गर्दै पत्रकारहरूबाट आएका जिज्ञासा, सुझाव र स्थानीय समस्याबारे छलफल गरिने छ। स्थानीय तह र सञ्चार क्षेत्रबीचको सहकार्यलाई अझ मजबुत बनाउँदै पारदर्शिता र सुशासन कायम गर्न यो अन्तरक्रिया महत्वपूर्ण हुने आयोजकले जनाएको छ।

मध्यपुर थिमि नगरपालिकाको प्रगति प्रतिवेदन  :

The post क्रियाशील पत्रकार मञ्चको आयोजनामा मध्यपुर थिमी नगरपालिकाको विकास र उपलब्धिबारे अन्तरक्रिया सुरू ​ appeared first on Jana Aawaj News.

जन आवाज न्युज/भक्तपुर । भक्तपुरको सूर्यविनायक नगरपालिका-८, पाटीभञ्ज्याङमा ‘आशापुरी तामाङ सामुदायिक होमस्टे’ औपचारिक रूपमा सञ्चालनमा आएको छ।

स्थानीय पर्यटन प्रवर्द्धन, रोजगारी सिर्जना तथा तामाङ समुदायको मौलिक संस्कृति संरक्षण गर्ने उद्देश्यका साथ होमस्टेको शुभारम्भ गरिएको हो।

होमस्टे सञ्चालनको अवसरमा आयोजित परिचयात्मक कार्यक्रममा सूर्यविनायक नगरपालिका-८ का वडा अध्यक्ष पुष्पराज बस्नेत प्रमुख अतिथिका रूपमा सहभागी भएका थिए भने कार्यक्रमको अध्यक्षता होमस्टेका अध्यक्ष अजय बाबु तामाङले गरेका थिए। कार्यक्रममा स्थानीय जनप्रतिनिधि, होमस्टे अभियन्ता, पर्यटनकर्मी, पत्रकार तथा स्थानीयवासीको उल्लेखनीय सहभागिता रहेको थियो।

कार्यक्रमलाई सम्बोधन गर्दै वडा अध्यक्ष बस्नेतले होमस्टेले स्थानीय स्तरमै रोजगारी सिर्जना गरी आर्थिक समृद्धिको आधार निर्माण गर्ने विश्वास व्यक्त गरे। उनले होमस्टे स्थापना गर्नु मात्र ठूलो उपलब्धि नभई त्यसलाई निरन्तर सञ्चालन गर्दै गुणस्तरीय सेवा दिनु अझ महत्वपूर्ण रहेको बताए।

उनले स्थानीय युवालाई सीप र सिर्जनासँग जोड्दै वैदेशिक रोजगारीको बाध्यता कम गर्न नगरपालिकाले यस्ता कार्यक्रमलाई प्राथमिकता दिएको उल्लेख गरे। स्थानीय उत्पादन, संस्कृति र आतिथ्यलाई पर्यटनसँग जोड्न सके आर्थिक विकासले गति लिने उनको भनाइ थियो।

कार्यक्रमका अध्यक्ष अजय बाबु तामाङले होमस्टे स्थापना गर्नुपूर्व गरिएको लामो तयारी, स्थानीयको सहकार्य र समुदायको साझा प्रयासबारे जानकारी गराउँदै आशापुरी तामाङ सामुदायिक होमस्टेलाई भविष्यमा देशकै नमुना होमस्टेका रूपमा विकास गर्ने लक्ष्य रहेको बताए। उनले पाटीभञ्ज्याङलाई नेपालको उत्कृष्ट पर्यटकीय गन्तव्यका रूपमा स्थापित गर्ने अभियानमा सबैको साथ आवश्यक रहेको पनि उल्लेख गर्नुभयो ।

कार्यक्रममा वडा कार्यालयको लगानीमा करिब दुई लाख रुपैयाँ बराबरका २७ सेट सामग्री होमस्टेलाई हस्तान्तरण गरिएको थियो। हस्तान्तरण गरिएका सामग्रीमा डम्फु, मादल, खैजडी, झ्याली लगायत सांस्कृतिक सामग्री समावेश छन्। यी सामग्रीले तामाङ समुदायको मौलिक सांस्कृतिक पहिचान संरक्षण र पर्यटकलाई आकर्षित गर्न सहयोग पुग्ने विश्वास गरिएको छ।

होमस्टेका सदस्य विकासकुमार तामाङका अनुसार हाल होमस्टेमा २७ वटा घर आबद्ध छन्, जहाँ एकैपटक करिब १५० जना पाहुनालाई आतिथ्य प्रदान गर्न सकिने क्षमता रहेको छ। भक्तपुरको डोलेश्वर र आशापुरी मन्दिरको बिचमा रहेको नैचालमा यो होमस्टे संचालनमा आएको हो ।

कार्यक्रममा होमस्टे महासंघका कोषाध्यक्ष सुरज बास्तोला, पूर्व अध्यक्ष केशव बराल, राजकुमार लामिछाने, वडा सदस्य विक्रम तामाङ, सावित्री मिश्र, अञ्जना नेपाली लगायतले होमस्टेले ग्रामीण पर्यटन विस्तार, स्थानीय आयआर्जन र संस्कृति संरक्षणमा महत्वपूर्ण भूमिका खेल्ने विश्वास व्यक्त गर्नुभयो ।

होमस्टेका कोषाध्यक्ष रिन्जिन तामाङले तामाङ समुदायले विगतमा भोग्नुपरेका विभिन्न कठिनाइको स्मरण गर्दै अब होमस्टे सञ्चालनसँगै समुदायको जीवनस्तरमा सकारात्मक परिवर्तन आउने आशा व्यक्त गर्नुभयो । कार्यक्रममा तामाङ संस्कृतिअनुसार अतिथिहरूलाई परम्परागत स्वागत गरिएको थियो। स्थानीय कलाकारहरूको आकर्षक सांस्कृतिक प्रस्तुति, तामाङ मौलिक गीत-संगीत तथा नृत्यले कार्यक्रमलाई थप जीवन्त बनाएको थियो।

आयोजकका अनुसार तामाङ समुदाय आफ्नो सरलता, इमान्दारिता र आत्मीय आतिथ्यका लागि परिचित भएकाले यहाँ आउने पाहुनाले विशिष्ट ग्रामीण जीवन, मौलिक संस्कृति र आत्मीय स्वागतको अनुभव गर्नेछन्। आजबाट औपचारिक रूपमा सञ्चालनमा आएको आशापुरी तामाङ सामुदायिक होमस्टेले स्थानीय पर्यटन प्रवर्द्धनसँगै आर्थिक समृद्धि र सांस्कृतिक संरक्षणमा नयाँ अध्याय सुरु गरेको विश्वास गरिएको छ।

The post भक्तपुरको आशापुरीमा तामाङ सामुदायिक होमस्टे’ सञ्चालन appeared first on Jana Aawaj News.

The post भक्तपुर नगरपालिकाको आ.व. २०८३-८४ का लागि बजेट सर्वसम्मतिबाट पारित appeared first on Jana Aawaj News.

भक्तपुर । भक्तपुर नगरपालिकाको २० औं नगरभा बुधबार सम्पन्न भएको छ । कार्यक्रममा प्रमुख सुनिल प्रजापतिको अध्यक्षतामा बसेको बीसौं नगरसभाको बैठकमा उपप्रमुख रजनी जोशीले भक्तपुर नगरपालिकाको आ.व. २०८३।८४ को अनुमानित आय–व्यय बजेट प्रस्तुत गर्नुभएको थियो ।
भक्तपुर नगरपालिकाको आन्तरिक स्रोत, संघीय र प्रदेश सरकारबाट प्राप्त हुने राजस्व बाँडफाँट, विभिन्न अनुदान र चालु वर्षको बैंक मौज्दातबाट व्यवस्थापन हुने गरी आ.व. २०८३।८४ को लागि रु. २ अर्ब ५५ करोडको बजेट प्रस्तुत भएको थियो ।
विनियोजित बजेटको चालुतर्फ १ अर्ब ५५ करोड ८९ लाख अर्थात् ६१.१३ प्रतिशत र पूँजिगततर्फ ९३ करोड ३१ लाख अर्थात् ३६.६० प्रतिशत तथा वित्तीयतर्फ ५ करोड ८० लाख (२.२७ प्रतिशत) विनियोजन गरेको छ ।
बजेट वक्तव्यमा नगरवासी जनताहरुको भावनाबमोजिम विभिन्न शैक्षिक विकास र शिक्षा क्षेत्रका लागि कुल बजेटको २२.०६ प्रतिशत अर्थात् ५६ करोड २७ लाख ४० हजार विनियोजत गरेको छ ।
त्यस्तै नगरपालिकाद्वारा सञ्चालित ख्वप अस्पताललाई आधुनिक सुविधायुक्त बनाउन र विशेषज्ञ सेवा विस्तार गर्न यसै आर्थिक वर्षभित्र एम.आर.आई. सेवा र आई.सी.यू. सेवा सञ्चालनको लागि कूल २३ करोड रुपैयाँ विनियोजन गरेको छ । स्वास्थ्य क्षेत्रका समग्र कार्यक्रमहरूका लागि रु ३५ करोड ६४ लाख अर्थात् १३.९७ प्रतिशत बजेट विनियोजन गरेको छ ।
नगरपालिकाले सम्पदा पुनःनिर्माण तथा संस्कृति संरक्षणका लागि आगामी वर्ष कुल ७ करोड ९० लाख, भौतिक पूर्वाधार निर्माणमा ३५ करोड अर्थात् १३.७२ प्रतिशत, पर्यटन प्रबद्र्धन गर्न कुल ३ करोड ८० लाख, वातावरण सुधार तथा फोहोरमैला व्यवस्थापन शीर्षकमा २३ करोड १५ लाख ८० हजार, खेलकुद विकास र पूर्वाधार निर्माणमा ३ करोड ७५ लाख, विपद्को समयमा जनतालाई सुरक्षित राख्न, उद्धार र पुनःस्थापनाका लागि ॅप्रकोप व्यवस्थापन कोष’ लाई सुदृढ बनाउन ४० लाख बजेट विनियोजन गरेको छ ।
भक्तपुर नगरपालिकाले कृषि क्षेत्रअन्तर्गत पूर्वाधार विकास र बजारीकरण, सहुलियत र अनुदान, प्रांगारिक खेती र वातावरण संरक्षण, संस्थागत सहयोग र अध्ययनलगायतका कार्यक्रमहरुका लागि आवश्यक बजेट विनियोजन गरेको छ । साथै बजेट वक्तव्यमा नगरपालिकाका लागि आवश्यक जग्गा खरिद र सार्वजनिक भवनहरुको मर्मत सम्भारका लागि आवश्यक बजेटको व्यवस्था गरेको छ ।
नगरसभाको सोही बैठकमा उपप्रमुख जोशीले “भक्तपुर नगरपालिकाको आर्थिक विधेयक २०८३”, “भक्तपुर नगरपालिकाको विनियोजन विधेयक, २०८३” सभासमक्ष प्रस्तुत गर्नुभएको थियो ।
नगरसभाको अर्को बैठक असार १२ गते शुक्रबार दिनको १ बजे बस्ने गरी स्थगित भएको थियो ।

The post भक्तपुर नगरपालिकाको अनुमानित बजेट रु. २ अर्ब ५५ करोड appeared first on Jana Aawaj News.