भक्तपुर । बागमती प्रदेश सभाका माननीय सभामुख सानुकुमार श्रेष्ठको निमन्त्रणामा नेपाल भ्रमणमा आउनुभएका स्पेनका सभामुख ब्लान्का मार्टिन डेल्गाडोको नेतृत्वमा २४ सदस्यीय प्रतिनिधिमण्डललाई भक्तपुर नगरपालिकाका प्रमुख सुनिल प्रजापति, उपप्रमुख रजनी जोशी, प्रदेश सभासद् सुरेन्द्रराज गोसाइँलगायतले पुष्पगुच्छा, भादगाउँले टोपी, खादा, परम्परागत थैली र जुजु धौं प्रदान गरी भक्तपुर दरबार क्षेत्रको प्रवेशद्धारमास्वागत गर्नुभएको छ ।
नगर प्रमुख प्रजापतिले बागमती प्रदेशसभाका माननीय सभामुख, उपसभामुख र भक्तपुर जिल्लाका माननीय सांसद र स्पेनिस संसदीय प्रतिनिधिमण्डल टोलीलाई भक्तपुर दरबार क्षेत्रमा अवस्थित सांस्कृतिक, पुरातात्विक एवम् ऐतिहासिक महत्वका सम्पदाहरुको स्थलगत अवलोकन गराउनुभयो ।

भ्रमणका क्रममा स्पेनको संसदीय दलका सभामुख ब्लान्का मार्टिन डेल्गाडो सम्मिलित प्रतिनिधिमण्डलले भक्तपुरका सांस्कृतिक, पुरातात्विक एवम् ऐतिहासिक सम्पदाहरुको अभिरुचिपूर्वक अवलोकन गर्नुभएको थियो । भ्रमण टोलीले भक्तपुर दरबार क्षेत्रमा अवस्थित राष्ट्रिय कला संग्रहालय, स्वर्णद्वार, पचपन्न झ्याल दरबार, सिद्धिलक्ष्मी मन्दिर, यक्षेश्वर महादेव मन्दिर, सिलु महादेव मन्दिर र चर्तुब्रम्ह महाविहार अवलोकन गर्दै टौमढी क्षेत्रको पाँचतले मन्दिर, भैरवनाथ मन्दिरको स्थलगत अवलोकन गर्नुभएको थियो ।

प्रमुख प्रजापतिले सभामुख डेल्गाडोसहितको प्रतिनिधिमण्डल टोलीलाई ‘मयुरको झ्याल’ र नगरपालिकाका प्रकाशनहरु मायाको चिनो उपहार प्रदान गर्नुभएको थियो । भ्रमणको क्रममा प्रतिनिधिमण्डल टोलीले भक्तपुर नपाले व्यवस्था गरेको सांस्कृतिक नाचहरु माक प्याखं, कवांचा प्याखं र जंगली प्याखंको रुचिपूर्वक अवलकेन गर्नुभएको थियो ।

स्पेनिस प्रतिनिधिमण्डलमा स्पेनका प्रदेशमन्त्री, मेयर, पत्रकार, व्यापारीहरुलगायत सहभागी थिए ।

The post स्पेनिस संसदीय प्रतिनिधिमण्डल भक्तपुर भ्रमणमा appeared first on Jana Aawaj News.

भक्तपुर । विद्यार्थी निकेतन माविको प्रांगणमा पानी ट्यांकी खन्ने क्रममा हालको जमिनको सतहबाट साढे ६ फिट मुनि टेपु ल्हाँे, टेलीय इँटा चिकं अप्पा, फ अप्पा, दाची अप्पाले बनाएको पेटीलगायतका पुरातात्विक भवनका अवशेषहरु भेटिएका छन् ।

सोही क्रममा भक्तपुर नगरपालिकाका प्रमुख सुनिल प्रजापति र उपप्रमुख रजनी जोशीले उक्त क्षेत्रको स्थलगत निरीक्षण गर्नुभएको हो ।

सोही क्रममा प्रमुख प्रजापतिले विद्यार्थी निकेतन माविका प्रअ सर्जनी जोशीसँग भेट गरी भक्तपुर नपाले त्यहाँ भेटिएका पुरातात्विक अवशेषहरुको विस्तृत अध्ययन गर्ने बताउनुहुँदै हाललाई उक्त निर्माण कार्य अगाडि नबढाउन पनि आग्रह गर्नुभएको छ ।

The post विद्यार्थी निकेतन माविमा पुरातात्विक भवनका अवशेषहरु भेटिए appeared first on Jana Aawaj News.

राम चन्द्र प्रजापति
भक्तपुर । नेपाल कम्युनिष्ट पार्टी एमालेको देशभर ७५३ नगर र गाउँ कमिटीको ऐतिहासिक प्रथम अधिवेशनको क्रममा भक्तपुर नगर संगठन कमिटीको भक्तपुर क्षेत्र नंं. २ का संघीय सांसद एवं नेपाल कम्युनिष्ट पार्टी एमालेका केन्द्रीय सदस्य तथा पूर्वमन्त्री महेश बस्नेतको प्रमुख आतिथ्यतामा सम्पन्न भएको छ।

प्रमुख अतिथी बस्नेतले आगामी मंसिर १० देखि १२ गते सम्म चितवनमा हुने केन्द्रीय महाधिवेशनमा ५ लाख जना सहभागी हुने जानकारि नगर अधिवेशनमा गर्नुभयो। पार्टीमा निरन्तर लागिरहनु पर्ने र पार्टीले उचित मुल्यांकन गर्ने बताउदै उदाहरणको रुपमा भक्तपुर नगरबाट बागमती प्रदेश सांसद भइ राज्यमन्त्री हुन सफल क. सरस्वती बाटीले पाउनु भएको अवसरले प्रष्ट रहेको र निरन्तर राजनीतिमा लागेकोले पार्टीले अवसर दिएको बताउनुभयो।

भक्तपुर नगरपालिका प्रत्यक्ष रुपमा नेमकिपाले शासन गरेको होला तर अप्रत्यक्ष रुपमा नेकपा एमालेले शासन गरेको हो, भनी बस्नेतले अधिवेशनमा बताउनुभयो। भक्तपुर नगरमा एमाले पार्टी शसक्त बनाउन आजका विशेष अतिथी नेकपा बागमती प्रदेश सदस्य तीन सुवालको महत्त्वपुर्ण भुमिका रहेको छ । कानुनी लडाइँ गर्न अधिवक्ता सानु सुवाल,सामाजिक कार्य गर्न समाजसेवी सहकारी अभियानता बाल मुकुन्द सुवाल र भक्तपुर अस्पताल बिकास समिति अध्यक्ष मिलन सुवाल रहेको नगरमा अझ एमाले पार्टीको झन्डा फहराउन सकिने बताउनुभयो।

भक्तपुर नगर संगठन कमिटी अध्यक्ष क. विष्णु सुवालको सभापतित्वमा सम्पन्न अधिवेशनमा नेकपा एमाले जिल्ला अध्यक्ष वचन देउजा, बागमती प्रदेश सदस्य बाल मुकुन्द सुवाल, जिल्ला कमिटी सदस्य मदन देउला, नगर संगठन सचिव विश्वराज शिल्पकार लगाएतले अधिवेशन सफलताको शुभकामना दिनुभएको थियो।

The post भक्तपुर नगरको ऐतिहासिक प्रथम नगर अधिवेशन सम्पन्न appeared first on Jana Aawaj News.

भक्तपुर । भक्तपुर नगरपालिकाको आयोजना तथा रिकिशी कम्पोष्ट प्रा.लि. को प्राविधिक सहयोगमा २०७८ भदौ २४ गतेदेखि असोज १ गतेसम्म भक्तपुर नगरपालिकाका कर्मचारीहरुलाई रिकीसी विधिद्वारा कुहिने फोहरलाई कम्पोष्ट मल बनाउने सम्बन्धी दशदिने तालिमका प्रशिक्षार्थीहरुलाई प्रमाणपत्र वितरण कार्यक्रम सम्पन्न भएको छ।
कार्यक्रममा प्रमुख अतिथि भक्तपुर नगरपालिकाका प्रमुख सुनिल प्रजापतिले यसप्रकारका तालिमले नेपाल र जापानबीचको सम्बन्ध सुमधुर हुने विश्वास व्यक्त गर्नुभयो । तालिमबाट प्राप्त सैद्धान्तिक ज्ञानलाई व्यवहारिक रुपमा सफल कार्यान्वयनमा जोड दिनुहुँदै नगर प्रमुख प्रजापतिले भक्तपुर नगरपालिकाद्वारा सञ्चालित कलेजहरुले नयाँ नयाँ प्रविधिबारे खोज तथा अनुसन्धान गरिरहेको बताउनुभयो ।
उहाँले दम खोकीका बिरामीहरूलाई सेवा प्रदान गर्ने उद्देश्यले जापान सरकारसँग सहकार्य गरी भक्तपुरको च्याम्हासिंहमा श्वासप्रश्वास पुनःस्थापना केन्द्र सञ्चालनमा ल्याएको अवगत गराउनुभयो ।
भक्तपुर नपाले यहाँका सम्पदा पुनःनिर्माण तथा विकास निर्माणका गतिविधिहरुमा विदेशी सहयोगलाई भन्दा स्थानीय जनताको सीप, सहयोग र साथलाई प्राथमिकतामा राखेको बताउनुहुँदै फोहोरबाट उत्पादित मल किसानहरुलाई वितरण गरी प्रत्यक्ष लाभ पु¥याउने उद्देश्य रहेको बताउनुभयो ।
भक्तपुर नपा वडा नं. ९ का वडाध्यक्ष एवम् वातावरण तथा पर्यटन समितिका संयोजक रबिन्द्र ज्याख्वले भक्तपुरको फोहोरमैला व्यवस्थापनमा थप वैज्ञानिक र आधुनिक विधि अपनाउन रिकिसी तालिम सञ्चालनमा ल्याएको बताउनुभयो । उहाँले कुहिने फोहरका कारण सहर दुर्गन्धित हुने भएकोले नगरपालिकाले कुहिने फोहोर व्यवस्थापन गर्दै मल बनाउने तालिमलाई थप विस्तार गर्दै लाने बताउनुभयो ।
ख्वप कलेज अफ इन्जिनियरिङका प्राचार्य सुनिल दुवालले रिकिशी प्रविधिको उचित प्रयोगबाट फोहोर व्यवस्थापन सहज हुने बताउनुहुँदै प्रविधिबाट बढीभन्दा बढी लाभ हासिल गर्नुपर्ने धारणा राख्नुभयो । रिकीशी कम्पोष्ट आयोजनाका प्रबन्ध निर्देशक उषा गिरीले भक्तपुर नपासँग सहकार्य गरी काम गर्ने अवसर प्राप्त भएकोमा खुशी व्यक्त गर्दै भक्तपुर नपाले फोहोर व्यवस्थापनमा गर्दै आएको काम निकै सराहनीय भएको बताउनुभयो । प्रमाणपत्र वितरण कार्यक्रममा कार्यपालिका सदस्य एवम् वातावरण तथा पर्यटन समितिका सदस्यद्वय सुनिता अवाल र सरिना द्योलाले पनि बोल्नुभएको थियो ।
कार्यक्रममा प्रशिक्षकको तर्फबाट सुरोज श्रेष्ठ, प्रशिक्षार्थीको तर्फबाट रमेश त्वी त्वी र रमिता तमखूले पनि तालिमबाट प्राप्त ज्ञानलाई व्यवहारमा प्रयोग गर्दै लाने र तालिमको उपादेयताबारे जानकारी दिनुभयो । सोही अवसरमा प्रमुख प्रजापतिले ‘जापानिज सी.एन.बी.एम. प्रविधिबाट प्राङगाारिक मल बनाउने तालिमका सहभागी प्रशिक्षार्थी र रिकिसी संस्थालाई प्रमाण वितरण गर्नुभएको थियो ।

The post रिकिशी कम्पोष्ट मल बनाउने तालिमका प्रशिक्षार्थीहरुलाई प्रमाणपत्र वितरण appeared first on Jana Aawaj News.

भक्तपुर । भक्तपुर नगरपालिका समुदाय प्रहरी साझेदारी समितिको आयोजनामा भक्तपुरमा अपराधको वर्तमान अवस्था समस्या पहिचान र समाधान विषयक अन्तरक्रिया कार्यक्रम सम्पन्न भएको छ ।
कार्यक्रममा भक्तपुर नगरपालिकाका प्रमुख सुनिल प्रजापतिले प्रहरी प्रशासन र जनप्रतिनिधिको साझा प्रयासले मात्र शान्ति सुरक्षा र अपराध नियन्त्रण सम्भव हुने बताउनुभयो ।
सम्पदा क्षेत्रमा हुने अभद्र तथा अनैतिक क्रियाकलापहरुबारे प्रहरी प्रशासन सतर्क हुनुपर्ने बताउनुहुँदै उहाँले सामाजिक अपराध न्युनीकरणमा सबैको संयुक्त पहल आवश्यक भएको बताउनुभयो ।
उहाँले प्रहरी साझेदारी समितिले वडा वडाका जनतालाई सचेत बनाउने अपेक्षा रहेको बताउनुहुँदै अपराध नियन्त्रण भए मात्र समाजलाई सभ्य र सुसंस्कृत बनाउन सकिने बताउनुभयो ।
उपप्रमुख रजनी जोशीले भक्तपुर नगरपालिका क्षेत्रभित्रको अपराधको घटनाहरु सार्वजनिक गरिनुपर्नेमा जोड दिनुहुँदै भक्तपुर नपालाई सुरक्षित नगर बनाउन सबैको संयुक्त पहल आवश्यक भएको बताउनुभयो ।
महानगरीय प्रहरी परिसर भक्तपुरका प्रहरी उपरीक्षक शिवकुमार श्रेष्ठले भक्तपुर जिल्लाको वर्तमान अपराधका अवस्थाबारे तथ्यांकसहितको प्रस्तुतीकरण देखाउनुभयो । उहा“ले समाजमा हुने कुनै पनि आपराधिक घटनाबारे समयमै प्रहरीलाई सूचना प्राप्त भए अपराध अनुसन्धान र नियन्त्रणमा प्रभावकारी हुने बताउनुहुँदै भक्तपुर जिल्लाको पाँचवर्षीय अपराध तथ्यांक बढ्दो अवस्थामा रहेको बताउनुभयो । कार्यक्रममा व्यक्त जिज्ञासाहरुमाथि प्रष्ट पार्नुहुँदै उपरीक्षक श्रेष्ठले अपराधका घटना नियन्त्रणमा जनप्रतिनिधि र स्थानीय जनताहरुसँगको सहकार्य आवश्यक भएको, नगरको मुख्य नाकाहरुमा सीसीटिभी जडान गर्ने योजना रहेको, मदिरा सेवन गरी होहल्ला र झगडा गर्नेहरुलाई प्रहरीको टोलीले आवश्यक परामर्श दिनेलगायतका कार्यहरुमा जोड दिँदै आएको बताउनुभयो ।
प्रस्तुतीकरण पश्चात कार्यक्रममा सहभागी जनप्रतिनिधि तथा विभिन्न संघ संस्थाका प्रतिनिधिहरुले आफ्ना जिज्ञासाहरु राख्नुहुँदै नगरपालिकाभित्र सञ्चालित किराना पसलहरुमा घरेलु मदिरा बिक्री वितरणका कार्य नियन्त्रण गर्नुपर्ने, जगाती—कमलविनायक सडकमा सीसीटिभी जडान गर्नुपर्ने, भट्टी पसलमाथि प्रहरीको निगरानी र नियन्त्रण आवश्यक भएको बताउनुभयो । उहाँहरुले द्रुत गतिमा सवारीसाधन हाँक्नेहरुलाई नियन्त्रणमा लिनुपर्ने, कलेज तथा विद्यालयहरुमा हुने लागू औषध सेवनमा प्रहरीले निगरानी राख्नुपर्ने, सम्पदास्थलमा घुम्ती प्रहरी परिचालन गर्नुपर्नेलगायतका जिज्ञासा राख्नुभएको थियो ।

The post भक्तपुरमा अपराधको वर्तमान अवस्था, समस्या र त्यसको समाधान विषयमा अन्तरक्रिया सम्पन्न appeared first on Jana Aawaj News.