भक्तपुर । नेपाल मजदुर किसान पार्टीका अध्यक्ष नारायणमान बिजुक्छेँ (रोहित) र भक्तपुर नगरपालिकाका प्रमुख सुनिल प्रजापतिसहितले भक्तपुरको ऐतिहासिक रानीपोखरी जीर्णोद्धारको स्थलगत निरीक्षण गर्नुभएको छ ।

अध्यक्ष बिजुक्छेँ र प्रमुख प्रजापतिसहितको टोलीले भक्तपुर नपा वडा नं. १ दुधपाटीस्थित सिद्धपोखरी र निर्माणाधीन भाजुपोखरीको पनि स्थलगत निरीक्षण गर्नुभएको थियो । निरीक्षणका क्रममा अध्यक्ष बिजुक्छेँले भक्तपुर नगरपालिकाले संरक्षणको अभावमा जीर्ण अवस्थामा रहेको भक्तपुरको रानीपोखरीलाई पुनः जीवन दिई सराहनीय कार्य गरेको बताउनुभयो । प्राचीन सहरहरूमा पोखरीको महत्व धेरै भएको बताउनुहुँदै उहाँले सभ्यताको विकास र महत्वबारे बुझ्न प्राचीन सम्पदाहरूको विशेष स्थान रहने र त्यसको संरक्षणमा सम्बन्धित निकायले ध्यान दिनुपर्नेमा जोड दिनुभयो ।

विदेशी सहयोग र अरुको भरमा गर्ने विकास निर्माणका कार्य दीगो नहुने बताउनुहुँदै उहाँले आफ्नै पहल र अगुवाईमा स्वाभलम्बी भई सम्पदा पुनःनिर्माण तथा जीर्णोद्धार गरी भक्तपुर नपाले देशकै लागि उदाहरणीय कार्य गरेकोे बताउनुभयो । नेपाल संवत् १६८७ मा तत्कालीन राजा जगज्योर्ति मल्लको पालामा निर्माण भएको रानी पोखरी र त्यसको डिलमा रहेको सत्तल पाटी एवम् देवालीस्थल भक्तपुरकै सांस्कृतिक एवम् ऐतिहासिक महत्वका सम्पदाहरूमध्ये पर्छन् । भक्तपुरको रानीपोखरी काठमाडौंको रानीपोखरीभन्दा चालीस वर्ष अघि बनेको इतिहास रहेको र उक्त पोखरी जीर्णोद्धारमा हालसम्म रु. २ करोड ७५ लाख बराबरको रकम खर्च भइसकेको रानीपोखरी उपभोक्ता समितिले जनाएको छ ।

भक्तपुर नपाले नेपाली सेनासँग समन्वय गरी उक्त पोखरीको पटक पटक सरसफाई गर्दै आएको र उक्त पोखरीमा प्राप्त प्रमाणहरूको आधारमा मौलिक स्वरुपमै पोखरीको जीर्णोद्धार र निर्माण सम्पन्न गर्ने नगरपालिकाले जनाएको छ । हाल उक्त पोखरी परिसरको दक्षिणतर्फ ह्वाङ ह्वाङ पाटी, पूर्व र उत्तरतर्फका प्रवेशद्वार र पाटीहरु निर्माण भइरहेका छन् ।

सोही क्रममा भक्तपुर नगरपालिकाका प्रमुख सुनिल प्रजापतिले भक्तपुरको रानी पोखरी जीर्णोद्धारको काम अन्तिम चरणमा पुगेको र पोखरी परिसरमा सौन्दर्यीकरणको कामहरू भइरहेको बताउनुभयो । तीनवटा उपभोक्ता समितिमार्फत रानीपोखरी पुनःनिर्माणको कार्य अगाडि बढिरहेको बताउनुहुँदै उहाँले पुनःनिर्माणको सम्पूर्ण कार्य छिटै सम्पन्न हुने र सर्वसाधारण जनताको निम्ति पोखरी खुल्ला हुने बताउनुभयो ।

भक्तपुरको रानी पोखरी जीर्णोद्धार कार्य २०७६ जेठ १५ गतेबाट सुरु भएको र करिब ३ महिना पश्चात् जीर्णोद्धार कार्य सम्पन्न हुने भक्तपुर नपा वडा नं. १ का वडाध्यक्ष श्यामकृष्ण खत्रीले जानकारी दिनुभयो ।

उक्त निरीक्षणमा भक्तपुर नपाका उपप्रमुख रजनी जोशी, प्रहरी उपरीक्षक शिवकुमार श्रेष्ठ, सैनिक आवासीय महाविद्यालयका प्रमुख सेनानी सन्तोष कार्की, भनपा वडा न. १ का वडाध्यक्ष श्यामकृष्ण खत्री, प्रमुख प्रशासकीय अधिकृत रामलाल श्रेष्ठ, सम्पदा शाखा प्रमुख रामगोविन्द श्रेष्ठ, प्रशासकीय अधिकृत दामोदर सुवाल, उपभोक्ता समितिका पदाधिकारीहरू लगायतको उपस्थिति रहेको थियो ।

The post अध्यक्ष बिजुक्छेँद्वारा भक्तपुरमा रहेको तीन पोखरीको स्थलगत निरीक्षण (तस्विरमा हेर्नुहोस्) appeared first on Jana Aawaj News.

भक्तपुर । नेपाल मजदुर किसान पार्टीका अध्यक्ष नारायणमान बिजुक्छेँ (रोहित) को प्रमुख आतिथ्यमा भक्तपुर नगरपालिकाको आयोजनामा विजया दशमी २०७८ को शुभकामना आदानप्रदान कार्यक्रम सोमबार सम्पन्न भएको छ । कार्यक्रममा बोल्नुहुँदै उहाँले सरसफाइकर्मीहरू चाडबाडको समयमा नगरको सरसफाईमा विशेष ध्यान दिएर लाग्नुपर्ने बताउनुहुँदै जुनसुकै समयमा जनताको सेवाको लागि जनप्रतिनिधि र कर्मचारीहरू तत्पर रहनुपर्ने बताउनुभयो ।

नजिकिँदै गरेको दशैं र तिहारमा कोभिड संक्रमणको खतरा बढ्ने हुँदा सचेतनामूलक कार्यक्रमहरू सञ्चालन गर्नुपर्नेमा उहाँले जोड दिनुभयो । कर्मचारीतन्त्र स्थायी सरकारको रुपमा प्रतिकात्मक मात्र भएकोले उनीहरुलाई कुनै पनि अनियमितता गर्न छुट नहुने विचार व्यक्त गर्नुहुँदै कर्मचारीहरुले व्यक्तिगत विषयमा भन्दा सामाजिक विषयलाई महत्व दिएर कार्यसम्पादन गर्नुपर्ने बताउनुभयो । विकास निर्माण र नक्सापास कार्यमा अनियमितता रोक्न प्राविधिकहरुको विशेष भूमिका हुने भएकोले यसप्रति प्राविधिकहरुलाई सचेत पार्दै कर्मचारीहरु शिष्ट, नम्र, विनयशील र नैतिकवान हुनुपर्ने उहाँले बताउनुभयो । नयाँ पुस्तालाई पठनीय अध्ययन सामाग्री जुटाउनतिर बुद्धिजीवी वर्ग अग्रसर हुनुपर्ने बताउनुहुँदै उहाँले देशकै नमुना नगरपालिकाको रुपमा ख्याति कमाएको भक्तपुर नगरपालिकाले आगामी दिनहरूमा त्यसको गरिमा कायम गर्नेतिर विशेष जोड दिनुपर्ने बताउनुभयो ।

संख्यात्मक हिसाबले ठूलो पार्टी हुँदैमा उनीहरूको विचार र सिद्धान्तसँग सहमत हुन नसकिने विचार राख्नुहुँदै अध्यक्ष बिजुक्छेँले शासक दलको पूर्वाग्राही व्यवहारका कारण आजका दिनसम्म ख्वप विश्वविद्यालय सञ्चालन स्वीकृति नपाएको जानकारी गराउनुभयो । भक्तपुर नगरपालिकाले नगर प्रहरीको व्यवस्था गरी नगरलाई थप सुरक्षित र व्यवस्थित बनाउनुपर्ने बताउनुहुँदै उहाँले आवास क्षेत्रमा भारी सवारीसाधन प्रवेश निषेधमा रोक लगाउनुपर्ने र जनतालाई नक्साबमोजिम घर निर्माण गर्ने विषयमा उत्साहित गर्नुपर्ने बताउनुभयो ।

कार्यक्रममा भक्तपुर नगरपालिकाका प्रमुख सुनिल प्रजापतिले कर्मचारीहरू सामान्य नागरिकभन्दा जिम्मेवार हुने हुँदा चाडपर्वको समयमा सिर्जनशील र रचनात्मक गतिविधिमा आबद्ध हुन आह्वान गर्नुभयो । उहाँले संस्कृतिसँगै भित्रिने विकृति र बिसंगतिबारे जनतालाई सचेत पार्न सबैले भूमिका खेल्नुपर्ने बताउनुभयो । छिमेकी देश भारतले नेपाललाई आर्थिक रुपले माथि उठ्न नदिन अनेक षड्यन्त्रका गतिविधिहरूलाई बढावा दिइरहेको बताउनुहुँदै उहाँले परमादेशबाट बनेको सरकारले देश र जनताको हितमा जनअपेक्षाअनुसार काम गर्ने कुरामा विश्वास गर्न विश्वास गर्न नसकिने बताउनुभयो । उहाँले भक्तपुर नपाका जनप्रतिनिधिहरूले जनताको निःस्वार्थ सेवा गरिरहेको बताउनुहुँदै शिक्षा, स्वास्थ्य, सरसफाई र सम्पदा संरक्षण कार्यमा अनुकरणीय काम भइरहेको समेत बताउनुभयो ।

भक्तपुर नपाका उपप्रमुख रजनी जोशीले न्यायिक समितिको काम, कर्तव्य र अधिकारसम्बन्धी प्रकाश पार्दैै महिला हिंसा, जग्गा विवाद, पारिवारिक झैझगडा जस्ता न्यायिक समितिमा दर्ता भएका मुद्दाहरूको न्यायोचित ढंगले सम्बोधन गर्दै आएको बताउनुभयो । कला, संस्कृति र भाषा विनाको पहिचान अधुरो हुने बताउनुहुँदै उपप्रमुख जोशीले स्थानीय पाठ्यक्रम लागू गरी भक्तपुरका विद्यार्थीहरूलाई सभ्य र सुसंस्कृत बनाउने प्रयास गरिरहेको बताउनुभयो ।

कार्यक्रममा प्रमुख प्रशासकीय अधिकृत रामलाल श्रेष्ठले दशैं बिदामा नगरपालिकाले दैनिक र नियमित गर्नुपर्ने सरसफाइ, पर्यटन, अनियमित निर्माण नियन्त्रणलगायतका विभिन्न क्षेत्रको कामहरु सम्बन्धित कर्मचारीहरुले जिम्मेवारी पूर्वक गर्नुहुन निर्देशन दिनुहुँदै कर्मचारीहरुको निःस्वार्थ कर्तव्य पालनले नगरपालिकाको छवि अझ राम्रो हुने बताउनुभयो ।

The post दशैंलाई सिर्जनशील र रचनात्मक क्षेत्रमा सदुपयोग गर्नुपर्ने ˸ अध्यक्ष बिजुक्छेँ appeared first on Jana Aawaj News.