जन आवाज न्युज/भक्तपुर, जेठ २८ । सूर्यविनायक नगरपालिका–८, सिपाडोलमा वडागत सार्वजनिक सुनुवाई कार्यक्रम भव्य रूपमा सम्पन्न भएको छ । राष्ट्रिय सञ्चार केन्द्र नेपालको आयोजना र सूर्यविनायक नागरपालिकाको समन्वयमा सम्पन्न कार्यक्रममा वडाबासी, जनप्रतिनिधि, कर्मचारी, सरोकारवाला निकाय तथा पत्रकारहरुको उल्लेख्य उपस्थिती रहेको थियो । कार्यक्रम डोलेश्वर मन्दिर परिषरमा आयोजना भएको थियो ।

कार्यक्रममा वडा अध्यक्ष पुष्पराज बस्नेतले वडाले गरेका विकास निर्माणका कामहरु उल्लेख गरेका थिए । प्रमुख अतिथिका रुपमा बोल्दै बस्नेतले वडामा हाल ७० करोड बराबरको विकास निर्माणका काम भइरहेको तथ्य सुनाएका थिए । वडा अध्यक्ष बस्नेतले वडाले प्रवाह गर्दै आएका सेवा, राजश्व व्यवस्थापन र पछिल्लो वर्षमा सम्पन्न विकास निर्माणबारे विस्तृत जानकारी प्रस्तुत गरेका थिए । धार्मिक, सांस्कृतिक र कृषि सम्भावनायुक्त डोलेश्वरधाम क्षेत्र समेटिएको सूर्यविनायक-८ लाई शान्त, हरियाली र ऐतिहासिक वडा बनाउने लक्ष्यसहित वडाले अघि सारेका योजना र कार्यान्वयनको प्रगति पनि कार्यक्रममा छलफलको विषय बनेको थियो ।

सार्वजनिक सुनुवाई कार्यक्रममा वडा सदस्यहरू विश्वराम त्वयनावासु, विक्रम तामाङ, सावित्री मिश्र, सदस्य अन्जना नेपाली तथा वडा सचिव प्रतिभा लामिछाने लगायतको उपस्थिति रहेको थियो ।

कार्यक्रममा उठेका प्रश्नहरूको जवाफ वडा अध्यक्ष बस्नेत र सूर्यविनायक नगरपालिकाका इञ्जिनियर जनक न्यौपानेले दिएका थिए ।

आयोजक संस्था राष्ट्रिय सञ्चार केन्द्रका उपाध्यक्ष पुष्करराज बुढाथोकीले स्वागत मन्तव्य व्यक्त गरेको कार्यक्रमको सञ्चालन केन्द्रका सचिव हेमराज ढकालले गरेका थिए । त्यसैगरी कार्यक्रमको प्रारम्भमा सार्वजनिक सुनुवाईको औचित्य, प्रक्रिया र अपेक्षित परिणामबारे पत्रकार दिवस गुरागाईंले मन्तब्य राखेका थिए । राष्ट्रिय सञ्चार केन्द्रका अध्यक्ष पेशल आचार्यको अध्यक्षतामा कार्यक्रम सम्पन्न भएको थियो । कार्यक्रमको समापन गर्दै अध्यक्ष आचार्यले वडालाई लिखित रुपमा सुझाव-सल्लाह हस्तान्तरण गरेका थिए ।

The post ७० करोड बराबरको बिकास निर्माणको काम भइरहेको छ : वडा अध्यक्ष बस्नेत appeared first on Jana Aawaj News.

जन आवाज न्युज/भक्तपुर जेस्ठ, २७ । वडागत सार्वजनिक सुनुवाई कार्यक्रम बालकोट स्थित सूर्यविनायक नगरपालिका वडा नं ३ को सभाहलमा मंगलबार सम्पन्न भएको छ ।

राष्ट्रिय सञ्चार केन्द्र नेपालको आयोजना सूर्यविनायक नगरपालिकाको सहकार्यमा सम्पन्न कार्यक्रममा वडाका जनप्रतिनिधि, वडाबासी र सञ्चारकर्मीहरुको बाक्लो उपस्थिती रहेको थियो । स्थानीय शासनलाई अझ जनमुखी र उत्तरदायी बनाउने उद्धेश्यले आयोजित कार्यक्रममा प्रश्न सोध्ने, जिज्ञासा राख्ने र सुझाव दिनेहरुको संख्या उल्लेख्य थियो ।

कार्यक्रममा वडाध्यक्ष दिपेन्द्र केसी प्रमुख अतिथिका रूपमा सहभागी थिए । वडासदस्यहरू घनश्याम भट्टराई, जनक भण्डारी, हेमा दहाल खतिवडा, वडा सचिव शेषराज दहाल, शहरी स्वास्थ्य केन्द्र बालकोटका प्रमुख सुशील घिमिरे, बालकोट खानेपानी तथा सरसफाइ संस्थाका अध्यक्ष लबकुमार कार्की, प्रहरी प्रभाग बालकोटका प्रमुख हरिबहादुर खड्का, वरिष्ठ इन्जिनियर जनक न्यौपाने, वडाका इन्जिनियर रामजी दाहाललगायतका सरोकारवाला निकायका प्रतिनिधिहरूले आ-आफ्नो विषयमा उठेका प्रश्नको जवाफ दिएका थिए ।

सार्वजनिक सुनुवाई कार्यक्रमका प्रमुख वक्ता वडाध्यक्ष दिपेन्द्र केसीले पछिल्लो एक वर्षमा वडाले गरेका भौतिक पूर्वाधार निर्माण, सेवा प्रवाह र समग्र विकास सम्बन्धी विस्तृत विवरण प्रस्तुत गरेका थिए । उनले भौतिक विकासदेखि जनतालाई दिई रहेको सेवा, सुविधाका सम्बन्धमा लामो जवाफ पस्केका थिए ।

वडा सचिव शेषराज दहालले कार्यालयबाट प्रदान गरिने सेवा, राजस्व व्यवस्थापन र प्रशासनिक कार्यबारे प्रस्तुति दिएका थिए ।

कार्यक्रमको मुख्य आकर्षण खुला प्रश्नोत्तर सत्र रह्यो । १५ जना सहभागीहरूले सरोकारका विषयमा जिज्ञासा, गुनासो र सुझावहरू राखेका थिए । ती प्रश्नको उत्तर वडाध्यक्ष, सचिव, वडा सदस्यहरू, स्वास्थ्य, खानेपानी र इन्जिनियरिङ क्षेत्रका सम्बन्धित अधिकारीहरूले दिएका थिए । नगरपालिकाले भौतिक निर्माण सम्बन्धमा गरेको विकास वारे नगरपालिकाका बरिष्ठ इन्जिनियर जनक न्यौपानेको प्रस्तुति आकर्षक थियो । उनले बालकोट क्षेत्रमा एकसाता भित्र सिसिटिभी जडान गरिसक्ने समेत जानकारी दिएका थिए ।

बालकोट क्षेत्रलाई भक्तपुरको ‘बानेश्वर’ भनेर चिन्ने अभिव्यक्तिसहित कार्यक्रमले अहिलेको तीव्र शहरीकरण, बसोबासको बढ्दो चाप र जीवनशैलीको रुपान्तरणका विषयमा समेत बहसको खाका तयार गरेको थियो । कार्यक्रम मार्फत संघीयताको अभ्यास अन्तर्गत ‘गाउँ-गाउँमा सिंहदरबार’ नारालाई व्यवहारमा उतार्न वडाको प्रयास कति प्रभावकारी रहेको छ भन्ने विषयमा समेत समीक्षा गरियो ।

आयोजक संस्था राष्ट्रिय सञ्चार केन्द्रका उपाध्यक्ष पुष्करराज बुढाथोकीले स्वागत मन्तव्य व्यक्त गरेको कार्यक्रमको सञ्चालन केन्द्रका सचिव हेमराज ढकालले गरेका थिए । त्यसैगरी कार्यक्रमको प्रारम्भमा सार्वजनिक सुनुवाईको औचित्य, प्रक्रिया र अपेक्षित परिणामबारे पत्रकार दिवस गुरागाईंले मन्तब्य राखेका थिए । राष्ट्रिय सञ्चार केन्द्रका अध्यक्ष पेशल आचार्यको अध्यक्षतामा कार्यक्रम सम्पन्न भएको थियो ।

The post सूर्यविनायक-३ बालकोटमा वडागत सार्वजनिक सुनुवाई भब्य रुपमा सम्पन्न appeared first on Jana Aawaj News.

जन आवाज न्युज/भक्तपुर, जेठ २६ । ‘हाम्रो वडा, हाम्रो आवाज’ भन्ने नारासहित सूर्यविनायक नगरपालिका-९ नङ्खेलमा सोमबार वडास्तरीय सार्वजनिक सुनुवाई कार्यक्रम सम्पन्न भएको छ ।

कार्यक्रममा वडा अध्यक्ष, जनप्रतिनिधि, कर्मचारी, टोल विकास संस्थाका प्रतिनिधि, पत्रकार तथा सर्वसाधारणको उपस्थिति रहेको थियो । कार्यक्रमको आयोजना राष्ट्रिय सञ्चार केन्द्र नेपालले सूर्यविनायक नगरपालिकाको सहकार्यमा गरेको थियो ।

कार्यक्रमका प्रमुख अतिथि वडाध्यक्ष भगवान खत्रीले पछिल्लो समय वडामा भएका विकास योजनाबारे लामो धारणा राखेका थिए । उनले भने – ‘पछिल्लो आर्थिक वर्षमा हामीले खानेपानी, ढल निकास, सडक, सार्वजनिक भवनलगायत पूर्वाधारमा उल्लेख्य प्रगति गरेका छौं ।’ उनले सेवा प्रवाहमा पारदर्शिता र सहजताको लागि वडा कार्यालय प्रतिबद्ध रहेको बताए ।

वडा सचिव अच्युतम खत्रीले वडा कार्यालयबाट आ.व. २०८१/८२ मा सेवा प्रवाह र राजश्व संकलनको तथ्याङ्क प्रस्तुत गरे । उनका अनुसार ३१२५ सिफारिस दर्ता, २६९३ चलानी, २० लाख ७६ हजार सम्पत्ति कर, ४१ लाख ९० हजार विविध कर संकलन गरिएको छ । जन्म, मृत्यु, विवाह, बसाइँसराइ लगायतका घटना दर्तामा समेत नियमितता देखिएको छ ।

सार्वजनिक कार्यक्रममा फ्लोर खुल्ला गरिएपछि आठ जनाले वडा अध्यक्ष तथा सरोकारवालाहरुसँग प्रश्न र सुझाव प्रस्तुत गरेका थिए । सो अवसरमा नगरपालिकाका वरिष्ठ इन्जिनियर जनक न्यौपानेले वडामा सम्पन्न तथा चालु भौतिक पूर्वाधार योजनाबारे जानकारी दिएका थिए । उनले भने, ‘विकास योजनामा प्राविधिक समन्वयका केही चुनौती छन्, तर वडासँग सहकार्य गरेर समाधान गरिरहेका छौं ।’

वडा सदस्य शेरकाजी सुवालले भने, ‘हामी विकासका नाममा मात्र होइन, सेवा प्रवाह र सुशासनमा पनि गम्भीर छौं । जनताको जिज्ञासा र सुझावले अझ राम्रो काम गर्न उत्प्रेरणा मिल्छ ।’

कार्यक्रममा वडाका सदस्य पूजा बराह, गंगा खड्का, विनय महत, कार्यपालिका सदस्य सुनिल भुजेललगायतको उपस्थिति थियो ।

कार्यक्रममा धन्यवाद ज्ञापन आयोजक संस्थाका अध्यक्ष पेशल आचार्यले गरेका थिए । कार्यक्रमको समापन गर्दै उनले भने, । ‘सार्वजनिक सुनुवाई केवल उत्तर दिने कार्यक्रम मात्र होइन, जनउत्तरदायित्व बोक्ने अवसर पनि हो । यसले वडाको सेवा, योजना र नेतृत्वको पारदर्शिता प्रमाणित गर्छ ।’

राष्ट्रिय सञ्चार केन्द्रका उपाध्यक्ष तथा पत्रकार महासंघ भक्तपुर शाखाका पूर्व अध्यक्ष पुष्करराज बुढाथोकीले पनि कार्यक्रममा उपस्थितलाई स्वागत गरेका थिए । वरिष्ठ पत्रकार दिवस गुरागाईंले कार्यक्रमको उद्देश्य बारे प्रकाश पारेका थिए ।

यो सार्वजनिक सुनुवाईले सेवा, विकास र सुशासनमाथि स्थानीय सरकार कति उत्तरदायी र जवाफदेही छ भन्ने प्रश्नमाथि प्रकाश पारेको छ । जनताको निगरानी, सुझाव र प्रश्नको सामना गर्दै अगाडि बढ्नु नै सच्चा लोकतन्त्रको अभ्यास हो भन्ने सन्देश यो कार्यक्रमले दिएको छ । राष्ट्रिय सञ्चार केन्द्रले हिजो आइतबार सूर्यविनायक वडा नं ४ मा सुनुवाई कार्यक्रम सम्पन्न गरेको थियो ।

पूरा भिडियो हेर्नुहोस् :

The post सूर्यविनायक वडा नम्बर ९ को सार्वजनिक सुनुवाई : सेवाको प्रभावकारिता र विकासमाथि नागरिकको सवाल appeared first on Jana Aawaj News.

जन आवाज न्युज/भक्तपुर जेस्ठ, २५ गते । सूर्यविनायक नगरपालिका वडा नं. ४ मा नागरिक उत्तरदायित्व र पारदर्शी शासन व्यवस्थाको प्रवद्र्धन गर्न आयोजित वडागत सार्वजनिक सुनुवाई कार्यक्रम आइतबार गाम्चामा सम्पन्न भयो ।

‘हाम्रो वडा, हाम्रो आवाज’ भन्ने नाराका साथ आयोजित सार्वजनिक सुनुवाई कार्यक्रम ‘राष्ट्रिय सञ्चार केन्द्र नेपाल (एनएमसी)’को आयोजना तथा सूर्यविनायक नगरपालिका, कटुन्जे भक्तपुरको सहकार्यमा सम्पन्न भएको हो ।

सूर्यविनायक नगरपालिका वडा नं. ४ का अध्यक्ष लछुराम न्यौपानेले वडाको विकास, सेवा प्रवाह र पारदर्शितालाई प्राथमिकतामा राख्दै आफ्नो तीनवर्षे कार्यकालमा उल्लेखनीय कामहरु सम्पन्न गरिएको बताए ।

आइतबार गाम्चामा सम्पन्न वडागत सार्वजनिक सुनुवाई कार्यक्रममा प्रमुख अतिथिका रूपमा बोल्दै उनले सडक, खानेपानी, स्वास्थ्य, शिक्षा लगायतका क्षेत्रमा अगाडि बढाइएका योजनाहरूको विवरण प्रस्तुत गर्दै, ‘जनताको करले संचालित वडाले जनताको अपेक्षाअनुसार काम गर्नुपर्छ भन्ने मान्यताबाट काम गर्दै आएको छु’ भन्ने धारणा राखे । सुनुवाई कार्यक्रममा एक दर्जन भन्दा बढी वडाका बासिन्दाले प्रश्न र गुनासो ब्यक्त गरेका थिए । त्यसमध्ये टोल विकास समितिका अध्यक्षहरु, पूर्व सुरक्षाकर्मी तथा पूर्व कर्मचारीहरुको संख्या धेरै थियो ।

कार्यक्रममा वडा सदस्य विदुर खड्का, तारा खतिवडा (सापकोटा) तथा वडा सचिव माधवराज घिमिरेले वडामा सम्पन्न विकास योजनाहरू र सेवा प्रवाहका विषयमा विवरणसहित जवाफ दिएका थिए ।

नगरका बरिष्ठ इन्जिनियर जनक न्यौपानेले भौतिक संरचना, ढल निकास र खानेपानीसँग सम्बन्धित प्रश्नहरूको जवाफ दिएका थिए ।

त्यस्तै, दधिकोट बृहत्त खानेपानी उपभोक्ता समितिका अध्यक्ष कृष्णहरी खड्काले खानेपानीका सवालमा उठेका जिज्ञासाहरूको जवाफ दिएका थिए । दधिकोट प्रहरी प्रभागका प्रमुख माधव डाँगीले हालै वडामा बढेका चोरीका घटनाबारे जानकारी दिँदै प्रहरीले अनुसन्धान गरिरहेको र चाँडै चोरहरुको पहिचान गर्ने विश्वास ब्यक्त गरेका थिए ।

कार्यक्रममा एक दर्जन पत्रकारहरू पनि उपस्थित थिए । पत्रकार महासंघ भक्तपुर शाखाका अध्यक्ष सुन्दर शिल्पकारले मन्तव्य राख्दै यस्तो सार्वजनिक सुनुवाई कार्यक्रमले जनप्रतिनिधि र जनतालाई नजिक ल्याउने काम गर्ने बताए । कार्यक्रममा सार्वजनिक सुनुवाईको औचित्यबारे सञ्चारकर्मी दिवस गुरागाईंले धारणा राखेका थिए । कार्यक्रमको सञ्चालन हेमराज ढकालले गरेका थिए भने समापन मन्तव्य एनएमसी अध्यक्ष तथा कार्यक्रमका सभापति पेशल आचार्यले ब्यक्त गरेका थिए । कार्यक्रममा स्वागत मन्तव्य राष्ट्रिय सञ्चार केन्द्र नेपालका उपाध्यक्ष पुष्करराज बुढाथोकीले राखेका थिए ।

सार्वजनिक सुनुवाई कार्यक्रमले वडा नं. ४ लाई ‘गाउँ गाउँमा सिंहदरबार’ अवधारणाअनुरूप उत्तरदायी र नागरिकमुखी सेवा प्रवाहको अभ्यासमा अग्रसर बनाउने संकेत दिएको सहभागीहरूको प्रतिक्रिया थियो ।

The post ‘हाम्रो वडा, हाम्रो आवाज’ नाराका साथ सूर्यविनायक-४ मा सार्वजनिक सुनुवाई सम्पन्न appeared first on Jana Aawaj News.