Total views : 406471
भक्तपुर । सूर्यविनायक नगरपालिकामा नगर बाल सञ्जालको आयोजना तथा सूर्यविनायक नगरपालिकाको समन्वयमा नगरस्तरीय बाल प्रतिभा प्रस्फुटन कार्यक्रम-२०८३ शुक्रबार सफलतापूर्वक सम्पन्न भएको छ।
कार्यक्रममा नगरपालिकाभित्रका बालबालिकाहरूले गायन, नृत्य, चित्रकला, देउसी–भैलो, साहित्यलगायत विभिन्न विधामार्फत आफ्ना प्रतिभा प्रस्तुत गरेका थिए। बालबालिकाहरूले आ–आफ्नो कला, क्षमता र सिर्जनशीलता प्रदर्शन गर्दै कार्यक्रमलाई उत्साहपूर्ण बनाएका थिए।
बालबालिकामा अन्तर्निहित प्रतिभाको पहिचान, प्रस्फुटन तथा प्रोत्साहन गर्नुका साथै उनीहरूको आत्मविश्वास, सिर्जनशीलता र व्यक्तित्व विकासमा टेवा पुर्याउने उद्देश्यले कार्यक्रम आयोजना गरिएको हो।
बालबालिकालाई आफ्नो प्रतिभा प्रस्तुत गर्ने अवसर प्रदान गर्दा उनीहरूको क्षमता अभिवृद्धि हुनुका साथै कला, संस्कृति र सिर्जनात्मक सोचको विकासमा समेत सहयोग पुग्ने विश्वास आयोजकले लिएको छ।
बालबालिकाको प्रतिभा र क्षमतालाई उजागर गर्दै उनीहरूलाई सामाजिक तथा रचनात्मक गतिविधिमा सक्रिय सहभागी गराउने यस्ता कार्यक्रमले बालमैत्री समाज निर्माण र उनीहरूको उज्ज्वल भविष्य सुनिश्चित गर्न महत्वपूर्ण योगदान पुर्याउने अपेक्षा गरिएको छ।
