Total views : 340593
काठमाडौं । ख्वप कलेज देकोचा भक्तपुरका पत्रकारिताका विद्यार्थीले मंगलबार सिंहदरवार काठमाडौं स्थित राष्टिय समाचार समिति रासस कार्यालयको अध्ययन भ्रमण गरेका छन् । कलेजमा पत्रकारिता स्नातक तह पहिलो वर्षमा पत्रकारिता मुख्य विषय लिई अध्ययनरत विद्यार्थीको टोली राससमा पुगेर अध्ययन भ्रमण गरेका हुन् ।
कार्यालयमा राससका प्रधान सम्पादक उत्तम सिलवालले पत्रकारिताका विद्यार्थीलाई राससमा स्वागत गर्दै राससमा हुने पत्रकारिताबारे जानकारी गराउनुभयो । उहाँले पत्रकारिता स्वतन्त्र, निष्पक्ष र विश्वसनीय हुनुपर्ने औंल्याउनुभयो । साथै पत्रकारिता हतारको साहित्य भएकाले पत्रकारितामा अल्छीपना नचल्ने बताउनुभयो ।
समाचार शाखाका डेपुटी चिफ रिपोर्टर नारायण न्यौपानेल विधागत पत्रकारिताबारे जानकारी गराउनुभयो । त्यस कारण पत्रकार वन्ने योजना भए जुन विधामा पत्रकारिता गर्न इच्छा छ, त्यस विषयबारे बिशेषज्ञ हुनु आवश्यक रहेको उहाँले बताउनुभयो । त्यसकारण जुनसुकै आफूलाई इच्छा लागेको विषयमा विशेषज्ञता हासिल गर्न उहाँले सुझाब दिनुभयो । यद्यपि सवैखाले पत्रकारले सामान्य जानकारी राख्नु पनि उतिकै आवश्यक रहेको उहाँले बताउनुभयो ।
रासस सञ्चार प्रविधि महाशाखाका नायब महाप्रबन्धक राजु शाक्यले राससले प्रदान गर्दै आएको भिडियो सेवाबारे जानकारी गराउनुभयो । राससले अहिले रेडियो र टिभीलाई पनि काम लाग्ने गरी समाचारहरुको अडियो र भिडियो सेवा पनि थालेको जानकारी गराउनुभयो ।
भ्रमणमा विद्यार्थीले राससमा भइरहेको गणतन्त्र फोटो प्रदर्शनीमा पनि सहभागी भएका थिए । फोटो प्रदर्शनीबारे जानकारी दिंदै राससका फोटो शाखा प्रमुख रत्न श्रेष्ठले गणतन्त्रपछि केही भएन भनेर निराशा व्यक्त गर्ने जनतालाई गणतन्त्रपछिको उपलव्धीबारे बोध गराउने थिमका साथ फोटो प्रदर्शनी गरेको जानकारी गराउनुभयो ।
विद्यार्थीले राससको समाचार कक्ष, सम्पादन कक्ष, भिडियो कक्षबारे जानकारी लिएका थिए । विद्यार्थीलाई सैद्धान्तिकसँंगै व्यवहारिक ज्ञान दिन अध्ययन भ्रमण गराइएको पत्रकारिताका शिक्षक कृष्ण किसीले बताउनुभयो ।
