Total views : 400852
जन आवाज न्युज/सुन्दरहरैँचा, मोरङ, भदौ ७ गते । सुन्दरहरैँचा सियोन तथा सुन्दरहरैँचा डब्लुएम (WM) का सदस्यहरूको संयुक्त आयोजनामा सुन्दरहरैँचा नगरपालिका वडा नम्बर १२ स्थित खोर्सानी बजार क्षेत्रमा एक बृहत् सरसफाइ कार्यक्रम सफलताका साथ सम्पन्न भएको छ।
खोर्सानी हटियादेखि मुख्य चोकसम्म सञ्चालन गरिएको उक्त सरसफाइ अभियानमा स्थानीय वातावरणलाई स्वच्छ र हराभरा बनाउने उद्देश्य राखिएको थियो।
कार्यक्रममा वडाका जनप्रतिनिधिहरू तथा स्थानीय टोल विकास समितिका अध्यक्षहरूको बाक्लो उपस्थिति रहेको थियो। जनप्रतिनिधि र स्थानीय अगुवाहरूको सहभागिताले कार्यक्रमको शोभा बढाउनुका साथै समुदायमा सरसफाइप्रतिको सजगता थप अभिवृद्धि गरेको आयोजकले जनाएका छन्।
आफ्नो वरपरको क्षेत्र सफा र व्यवस्थित देखिएपछि स्थानीयवासी तथा छिमेकीहरू निकै खुसी र प्रसन्न देखिन्थे। स्थानीय क्षेत्रको स्वच्छताका लागि यस्ता सामुदायिक प्रयासहरूलाई निरन्तरता दिइनुपर्नेमा सहभागीहरूले जोड दिएका छन्।
