Total views : 390339
जन आवाज न्युज/भक्तपुर, साउन २३ गते । “रक्तदान – जीवनदान” भन्ने मूल नाराका साथ नेपाल रेडक्रस सोसाइटी, दधिकोट उपशाखाको आयोजनामा तर्खगाल चोकमा आकस्मिक रक्तदान कार्यक्रम सफलतापूर्वक सम्पन्न भएको छ।
अस्पतालहरूमा भइरहेको रगतको अभावलाई मध्यनजर गर्दै आयोजना गरिएको उक्त कार्यक्रममा अरनिको जीवनयोग प्रयोगशाला (जीवन विज्ञान) ले सहयोगी संस्थाको रूपमा भूमिका निर्वाह गरेको थियो।
सामाजिक उत्तरदायित्व र मानवीय सेवाको भावना जगाउने उद्देश्यले आयोजित यस कार्यक्रममा १५ जना स्वयंसेवी रक्तदाताहरूले रक्तदान गरेका छन्।
उक्त आकस्मिक रक्तदान कार्यक्रममा स्थानीय वडा अध्यक्ष, नेपाल रेडक्रस सोसाइटीका प्रतिनिधिहरू, विभिन्न संघ-संस्थाका प्रतिनिधिहरू पत्रकार तथा स्थानीय बासिन्दाहरूको बाक्लो उपस्थिति रहेको थियो।
कार्यक्रमका वक्ताहरूले रगतको विकल्प रगत नै भएकाले यस किसिमका मानवीय कार्यले धेरै मानिसको जीवन बचाउन मद्दत पुग्ने धारणा व्यक्त गर्दै रक्तदाता तथा सहयोगी संस्थाप्रति आभार व्यक्त गरेका थिए।
