Total views : 371488
काठमाडौँ । बुढानीलकण्ठ नगरपालिकाको सूचनाको हक तथा स्वतः प्रकाशन सम्बन्धी अभिमुखीकरण कार्यक्रम शनिबार सम्पन्न भएको छ । सूूचनाको हक सम्बन्धि ऐनले हरेक सरकारी कार्यालयले तीन तीन महिनामा नगरपालिकाका गरेका काम तथा सूचना स्वत प्रकाश गर्नपर्छ ।
बुढानीलकण्ठ नगरपालिकाले नागरिकको सूचनामा पहुँच सुनिश्चित गर्न र पारदर्शी स्थानीय शासन प्रणाली विकास गर्न स्वत प्रकाशन सम्बन्धि अभिमुुखीकरण गरेको हो ।
सो अवसरमा बुढानीलकण्ठ नगरपालिकाका नगर प्रमुख मिठाराम अधिकारी, काठमाडौं जिल्लाका प्रमुख जिल्ला अधिकारी ईश्वरराज पौडेल, उप-प्रमुख अनिता लामा, राष्ट्रिय सूचना आयोगका सूचना आयुक्त दुर्गा भण्डारी पौडेल लगायतको उपस्थिति रहेको थियो । साथै वडा अध्यक्षज्यूहरू, कार्यपालिका सदस्यज्यूहरू, नगर सभा सदस्यज्यूहरू, महाशाखा तथा शाखा प्रमुखज्यूहरू र अन्य महानुभावहरूको उल्लेख्य सहभागिता रहेको थियो ।
कार्यक्रमको सहजकर्ता प्रशासकीय अधिकृत महेशप्रसाद पाठकले गर्नुुभएको थियो । नगर प्रमुख अधिकारीले लोकतन्त्रलाई सुदृढ बनाउन सूचनाको हक अत्यन्त महत्वपूर्ण रहेको उल्लेख गरे । स्थानीय तहले पारदर्शिता, जवाफदेहिता र सुशासन कायम गर्न स्वतः प्रकाशनलाई प्रभावकारी रूपमा कार्यान्वयन गर्नुपर्ने आवश्यकता औंल्याएका थिए ।
प्राविधिक सत्रअन्तर्गत प्रमुख जिल्ला अधिकारी ईश्वर राज पौडेलले सूचनाको हकसम्बन्धी कानुनी प्रावधान, नागरिकको अधिकार र कार्यान्वयनका पक्षबारे जानकारी दिएका थिए भने राष्ट्रिय सूचना आयोगका सूचना आयुक्त दुर्गा भण्डारी पौडेलले नेपालमा सूचनाको हकसम्बन्धी व्यवस्था, यसको प्रयोग, चुनौती र अवसरका विषयमा विस्तृत प्रस्तुति दिएका थिए ।
कार्यक्रमको समापन नगर प्रवक्ता तथा १० नम्बर वडा अध्यक्ष नवराज भट्टराईले गर्दै अभिमुखीकरण कार्यक्रमले जनप्रतिनिधि र कर्मचारीहरूलाई सूचनाको हक प्रभावकारी रूपमा कार्यान्वयन गर्न थप प्रेरणा मिलेको विश्वास व्यक्त गरेका थिए ।
