Total views : 344274
जन आवाज न्युज भक्तपुर । “पर्यटन विकासका लागि मध्यपुर महोत्सव” भन्ने उद्देश्यका साथ शुक्रबारबाट भक्तपुरको मध्यपुर ठिमी नगरपालिकामा मध्यपुर महोत्सव–२०८१ शुरु भएको छ ।
आजको उक्त कार्यक्रममा उपप्रधान तथा शहरी विकास मन्त्री प्रकाशमान सिंहले उद्घाटन गर्दै ३ दिन सम्म संचालन हुने महोत्सवको माध्यमाद्धारा यस ठाँउको कला संस्कृति र परम्पराको अद्वितीय संगम स्थल रहेको मध्यपुर महोत्सवले ठुलो प्रभाव पार्ने बताउनुभयो । यस प्रकारको महोत्सवलाई विभिन्न ठाँउहरुमा संचालन गर्नुपर्ने बताउनुभयो । नेवारी परम्परामा भएको मौलिक परिकारहरुको प्रर्दशन गर्ने अवसर भएकोले महोत्सवको भव्य सफलताको शुभकामना दिनुभयो ।
आजदेखि शुरु भएको महोत्सवमा स्थानीय प्रशासन, सामाजिक संघ संस्था, र स्थानीय समुदायको समन्वय र सहकार्यमा महोत्सव प्रभावकारी बनाउने योजनाका साथ तयारी भएको आयोजक समितिले जानकारी गराएको छ ।
महोत्सवमा स्थानीय परम्परा स्थानीय कला, संस्कृति, र परम्पराको अद्वितीय संगम स्थल रहेको मध्यपुर महोत्सवमा विभिन्न आकर्षकका केन्द्रबिन्दु रहेको छ । महोत्सवमा शंखधर चोकदेखि बोडेको टिगनिसम्म करिब ५.५ किलोमिटरको दुरीसम्मको स्थानहरुमा त्यहाँका कला, सिप देखाउने स्टलहरु तयार गरिएको छ ।
महोत्सवमा माटोको भाँडा बनाउने, मुकुण्डो बनाउने, चिउरा कुट्ने, तेल पेल्ने, परम्परागत मदिरा बनाउने, खानाको परिकार बनाउने, कपडा बुन्ने, बत्ती काट्ने, धूप बाट्ने, खेती गर्ने, पिठो पिस्ने, चामल कुट्ने, गेडागुडीको व्यापार, मूर्र्तीकला, हस्तकलाको पनि अवलोकन गर्न सकिने छ ।
यसैगरी भजनकीर्तन, पूजा, वृद्ध तथा बालबालिकाको खेल, बाँसुरी बाजासहित नगर परिक्रमा, धिमेबाजा प्रदर्शन गरिने बताइएको छ । महोत्सवमा नेवारी मौलिक परिकारका साथै साँस्कृतिक प्रदर्शनी अन्तर्गत नेवाः भ्वयका प्रकारहरू, मध्यपुरसँग सम्बन्धित पुस्तक, गेडागुडी, नेवाःसमाजको जीवनशैलीसँग सम्बन्धित भेषभुषा, भाँडाकुँडा तथा औजारहरू, बाजागाजा प्रदर्शनी गरिने छ ।
