Total views : 361890
भक्तपुर। नेपालमा हाल पश्चिमी वायु, स्थानीय वायु र तल्लो वायुमण्डलमा विकसित न्यून चापीय क्षेत्रको संयुक्त प्रभाव कायम रहेको छ। मौसम पूर्वानुमान महाशाखाका अनुसार यस प्रणालीले मुलुकभरको मौसममा बदली रहने बताएको छ।
आज दिउँसो कोशी, मधेस, बागमती, गण्डकी र लुम्बिनी प्रदेशका धेरै स्थानका साथै कर्णाली र सुदूरपश्चिमका पहाडी तथा हिमाली भूभागमा चट्याङ्गसहित मध्यम वर्षा र हिमपातको सम्भावना छ। कोशी प्रदेशका पहाडी भूभागका केही स्थानमा भारी वर्षा हुने बताएको छ। यसैगरी तराईका केही क्षेत्रमा हावाहुरी चल्न सक्ने देखिएको छ।
बुधबार राति कोशी, मधेस, बागमती र गण्डकी प्रदेशमा धेरै स्थानमा तथा अन्य प्रदेशका पहाडी र हिमाली भूभागका थोरै स्थानमा चट्याङ्गसहित मध्यम वर्षा र हिमपात हुने सम्भावना रहेको छ। राति पनि कोशी र गण्डकी प्रदेशका पहाडी क्षेत्रमा भारी वर्षा र तराईका केही भागमा हावाहुरीको जोखिम रहेको महाशाखाले जनाएको छ।
भारी वर्षा, चट्याङ्ग र हावाहुरीको सम्भावना रहेकाले महाशाखाले सम्बन्धित क्षेत्रका बासिन्दाहरूलाई सतर्क रहन र आवश्यक सुरक्षा उपायहरू अपनाउन आग्रह गरेको छ। कृषि, स्वास्थ्य र दैनिक जनजीवनमा पर्न सक्ने असरलाई मध्यनजर गर्दै सावधानी अपनाउन महाशाखाले बताएको छ ।
