Total views : 355378
एजेन्सी । भारतको केन्द्र सरकारद्वारा शासित प्रदेश जम्मु–कस्मिरमा गत सोमबारदेखि सेना र अतिवादी समूहबीच लडाइँको क्रममा अहिलेसम्म २२ जनाको मृत्यु भएको बताइएको छ ।
बीबीसी हिन्दीले जानकारी गराएअनुसार भारतीय सेनाले गत सोमबार सरनकोटको एक गाउँबाट आतंकवादी समूहविरुद्ध अपरेसन सुरु गरेपछि भारतीय सेनाका ९ जना र अतिवादी समूहका १३ जना मारिएको भारीतय सेनाले दाबी गरेको हो । यस्तै अपरेसनको पहिलो दिनमै सेनाका एकजना जुनियर अफिसरसहित ५ जना मारिएका थिए भने, दोस्रो दिनमा फेरि थप दुई जवान मारिएको बताइएको छ ।
सेना र आतंकवादी समूहबीच अहिले पनि पुँछ र राजौरीको घना जंगलमा लडाइँ चलिरहेको बीबीसी हिन्दीले जानकारी गराएको छ ।
यसबीच कस्मिरको कुलमागमा आइतबार गोली हानेर दुई जना गैरकस्मिरी नागरिकको हत्या गरिएको समेत बताएको छ । भारतीय सञ्चारमाध्यमका अनुसार आतंकवादीद्वारा उत्तर प्रदेशको सहरानपुरका सगिर अहमद र बिहारको बाँका क्षेत्रका अरविन्द कुमार साह मारिएको बताइएको छ । त्यसअघि शनिबार पनि आतंकवादीले दुई जना मजदुरको हत्या गरेका छन् । सर्वसाधारणको हत्याले कस्मिरका राजनीतिक दल आक्रोशित भएका छन् । यसपछि भारतीय सुरक्षा बलले थालेको अपरेसन अभियानका क्रममा १३ जना आतंकवादी मारिएको दाबी गरिएको छ ।
