Total views : 406173
भक्तपुर । विनायक शिक्षा निकेतनका प्रिन्सिपल सुरेन्द्रविक्रम प्रजापतिको नेतृत्वमा शैक्षिक तथा सांस्कृतिक आदानप्रदान कार्यक्रमका लागि जापान जान लाग्नुभएका शिक्षक तथा विद्यार्थीहरूलाई विद्यालयले एक समारोहका बिच भव्य बिदाइ गरेको छ।
बिदाइ हुने टोलीमा प्रिन्सिपल प्रजापतिसहित चार जना विद्यार्थीहरू तुलज प्रजापति, प्रयान चक्रधर, सलिना घिमिरे र सदिक्षा श्रेष्ठ रहनुभएको छ। विद्यालयमा आयोजित विशेष कार्यक्रममा सहायक प्रिन्सिपल प्रेमप्रसाद निरौलाले भ्रमण टोलीका सदस्यहरूलाई टीका तथा खादा लगाएर सफलताको शुभकामनासहित बिदाइ गर्नुभएको थियो।
असोज २५ गतेदेखि कार्तिक ९ गतेसम्म सञ्चालन हुने उक्त भ्रमण अवधिभर भ्रमण टोलीले जापानका पाँचवटा विद्यालय, तीनवटा नगरपालिका, एउटा प्रदेश सरकार र जापानको संसद् भवनको अवलोकन गर्नुका साथै त्यहाँका प्रमुखहरूसँग भेटघाट गर्ने कार्यक्रम रहेको छ।
भ्रमणको उद्देश्यबारे प्रकाश पार्दै टोली नेता एवं प्रिन्सिपल सुरेन्द्रविक्रम प्रजापतिले भन्नुभयो, “जापानको शैक्षिक पद्धति र संस्कृतिबारे प्रत्यक्ष जानकारी लिने र नेपालको धनी संस्कृति तथा शिक्षा प्रणालीबारे त्यहाँका विद्यार्थीहरूलाई गराउने उद्देश्यले यो भ्रमण आयोजना गरिएको हो।”
कार्यक्रममा अभिभावकहरू प्रवीण चक्रधर, सबिना घिमिरे र गणेश श्रेष्ठले आफ्ना छोराछोरीले विश्व परिवेश र नयाँ विषयवस्तु सिक्ने अवसर पाउनेमा विश्वास व्यक्त गर्नुभयो। यस्तो सुनौलो अवसर जुराइदिने प्रिन्सिपल तथा विद्यालय परिवारप्रति उहाँहरूले हार्दिक धन्यवाद व्यक्त गर्नुभयो।
