Total views : 403942
भक्तपुर, कार्तिक ११ गते । बङ्गालको खाडीमा विकसित भइरहेको चक्रवात ‘अरनब’को प्रभावले नेपालका विभिन्न क्षेत्रमा भारी वर्षा, चट्याङ र हावाहुरीको सम्भावना देखिएको छ। यसबाट उत्पन्न हुन सक्ने सम्भावित जोखिमलाई मध्यनजर गर्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले उच्च सतर्कता अपनाउन सर्वसाधारणमा विशेष आग्रह गरेको छ।
प्राधिकरणका अनुसार आगामी कात्तिक १३ र १४ गते कोशी, मधेश, बागमती, गण्डकी र लुम्बिनी प्रदेशका धेरै स्थानमा मेघगर्जन, चट्याङ र हावाहुरीसहित मध्यम वर्षा हुनेछ भने केही स्थानमा भारी वर्षाको समेत सम्भावना रहेको छ।
प्राधिकरणका प्रवक्ता रामबहादुर केसीले जल तथा मौसम विज्ञान विभागको पूर्वसूचनालाई उद्धृत गर्दै चक्रवात ‘अरनब’को प्रभाव कात्तिक १३ गते शुक्रबारदेखि नेपालमा पर्ने बताएका छन्। यस प्रणालीको प्रभाव कर्णाली र सुदूरपश्चिम प्रदेशका केही स्थानहरूमा समेत पर्ने अनुमान गरिएको छ।
साथै, उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको समेत जोखिम रहेको प्राधिकरणले जनाएको छ। प्रतिकूल मौसमका कारण जनजीवन प्रभावित हुन सक्ने भएकाले अति सावधानी अपनाउन अपिल गरिएको छ।
सुरक्षाका लागि अपनाउनुपर्ने सावधानीहरू:
- सम्भावित जोखिमबाट बच्न उच्च पहाडी तथा हिमाली क्षेत्रको यात्रा नगर्ने।
- अत्यावश्यक कामबाहेक लामो तथा अनावश्यक यात्राबाट टाढा रहने।
- नदी तथा खोलाका किनार एवं बाढीको जोखिम भएका क्षेत्रहरूमा नबस्ने।
- मौसमसम्बन्धी आधिकारिक पूर्वसूचनालाई नियमित रूपमा अवलोकन गर्ने र जोखिम महसुस भएमा तत्काल सुरक्षित स्थानमा जाने।
आपत्कालीन सम्पर्क नम्बरहरू:
विपद् वा आपत्कालीन अवस्थामा सहयोग लिनका लागि निम्न नम्बरहरूमा सम्पर्क गर्न सकिनेछ:
- मौसमसम्बन्धी जानकारीका लागि: ११५५
- विपद् सहायताका लागि: ১২৩৪ (१२३४)
- नेपाल प्रहरी: १००
- पर्यटक प्रहरी: ११४४
