Total views : 355204
रोशन राज अर्याल
भक्तपुर । भक्तपुर अस्पतालको मेडिकल सुपरिन्टेन्डेन्टमा बागमती प्रदेश सरकारले पुन : तेस्रो पटक डा. सुमित्रा गौतम नियुक्त गरेको छ ।
विभिन्न अस्पताल सुधार गर्न सक्ने अब्बल नेतृत्व भूमिका भएकी विशेषज्ञ डा. गौतमले यस अघि नै दुई पटक भक्तपुर अस्पतालको नेतृत्व गरिसक्नु भएको छ । २०७९ माघ २७ मा ११ औँ तहमा बढुवा हुनु भएको थियो ।
भक्तपुर अस्पताललाई सर्वोत्कृष्ट बनाउन नेतृत्व लिनुभएको गौतमलाई फिर्ता लिन प्रदेश सँग परामर्श नगरेको भन्दै मुख्यमन्त्री शालीकराम जम्कट्टेलले संघीय मन्त्रालयसंग असन्तुष्ट व्यक्त गर्नुभएको थियो । स्वास्थ्य तथा जनसंख्या मन्त्रालयले पुन : डा गौतमलाई प्रदेशमा काज सरुवा गरेसँगै मुख्यमन्त्री तथा मन्त्री परिषद्को कार्यालयले उहाँलाई भक्तपुर अस्पतालको मेसुमा पदस्थापन गरेको छ ।
डा.गौतम भक्तपुर अस्पतालको तेस्रो पटक नेतृत्व समाल्दै गर्दा भक्तपुर अस्पतालको मेसु भएका डा.त्रिभुवन चन्द्र झालाई भने नुवाकोट सरुवा गरिएको छ । डा. गौतमको नेतृत्वमा नै सिन्धुली अस्पतालमा समेत २०७४ मा उत्कृष्ठ हुन सफल भएको थियो भने, २०७७ मा भक्तपुर अस्पताल पनि बागमती प्रदेशको उत्कृष्ट अस्पताल बन्न सफल भएको थियो ।
