Total views : 357227
काठमाडौं । नेपाली चलचित्र ‘कल्ली’ चैत्र २९ मा रिलिज गर्ने घोषणा गरिएको छ । रेड बर्ड प्रोडक्शन र कस्तुरी प्रोडक्शनको ब्यानरमा नयाँ फिलम निर्माणको घोषणा गरिएको हो । निर्माता किरण नेपालीको प्रस्तुतिमा तयार हुन लागेको नयाँ चलचित्रको नाम ‘कल्ली’ बताइएको छ ।
यस चलचित्रमा लक्ष्मण सुनारको कथा तथा निर्देशन रहनेछ भने, फिल्म ‘बुलाकी’ निर्देशन गरेपछि लक्ष्मण यतिबेला चर्चामा रहेका छन् । उनको निर्देशनमा बन्ने यो फिल्म पनि केही फरक र विशेष हुने अपेक्षा गरिएको छ । चलचित्रमा महेश दवाडीको पटकथा तथा संवाद रहेको छ, भने निर्माण प्रमुख सुरज आचार्य रहेका छन् ।
चलचित्रकोे मुख्य भूमिकामा नायक पल शाह र नायिका बेनिशा हमालले काम गर्ने पक्का भएको छ । फिल्मको छायांकन अगावै निर्माण पक्षले पल र बेनिशाको गेटअप समेत सार्वजनिक गरेको छ । सार्वजनिक तीन पोस्टरमा पल शाह देखिएका छन् भने बेनिशाको अवतार केही भिन्न रहेको छ । हातमा अग्नी बोकेकी बेनिशाको गेटअपले दर्शकलाई केही फरक अनुभुती हुने निश्चित गरेको छ । एउटा पोष्टरमा बेनिशाको आँखाबाट आँशु झरेको देख्न सकिन्छ । नायक पल शाह र नायिका बेनिशा हमालले पहिलो पटक एकसाथ पर्दामा काम गर्न लागेका हुन् । फिल्मको प्रदर्शन मिति समेत घोषणा गरिएको छ ।
सार्वजनिक तीन पोस्टरबाट पल र बेनिशाले यसअघि काम नगरेको भूमिकामा काम गर्दैछन् भन्ने प्रष्ट हुन्छ । फिल्मको पोष्टरलाई राकेश दाहालले तयार पारेका छन् । यसैगरी फिल्मको छायांकन कर्र्णाली प्रदेशका विभिन्न रमणीय स्थानमा गर्ने तयारी भइरहेको र तिहारपछि फिल्मको छायांकन सुरु हुने निर्देशक सुनारले जानकारी दिनुभएको छ ।
