Total views : 405789
भक्तपुर, भदौ १४ गते । रसुवास्थित भोटेकोशी नदीमा आएको विनाशकारी बाढीबाट भएको जनधनको क्षतिप्रति दुःख व्यक्त गर्दै सूर्यविनायक नगरपालिकाले बाढीपीडितका लागि रु. ५५ लाख ५५ हजार ५५५ आर्थिक सहयोग गर्ने निर्णय गरेको छ।
नगर प्रमुख बासुदेव थापाको अध्यक्षतामा आइतबार बसेको नगर कार्यपालिकाको २१५औँ आकस्मिक बैठकले नगरपालिकाको विपद् व्यवस्थापन कोषबाट उक्त रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको हो।
त्यस्तै, जनप्रतिनिधिहरूले आफ्नो साउन महिनाको सेवा सुविधाबाट समेत सहयोग गर्ने भएका छन्। नगर प्रमुखले रु. ३५ हजार, नगर उपप्रमुखले रु. १५ हजार, वडा अध्यक्षहरूले प्रतिव्यक्ति रु. १० हजार, कार्यपालिका सदस्यहरूले प्रतिव्यक्ति रु. ६ हजार तथा वडा सदस्यहरूले प्रतिव्यक्ति रु. २ हजार ५ सय सहयोग गर्ने निर्णय भएको नगरपालिकाले जनाएको छ।
नगरपालिकाले बाढीमा परी बेपत्ता भएकाहरूको खोजी तथा उद्धार, घाइतेको उपचार र प्रभावित नागरिकको सुरक्षित पुनर्स्थापनाका लागि आवश्यक सहयोगमा सक्रिय रहने जनाएको छ।
साथै, विपद्को यस कठिन घडीमा नागरिक समाज, निजी क्षेत्र, संघ-संस्था तथा शुभेच्छुकहरूलाई आ-आफ्नो क्षेत्रबाट सम्भव सहयोग गर्न नगरपालिकाले अपिल गरेको छ।
