Total views : 344274
काठमाडौं । माओवादी केन्द्रको विद्यार्थी संगठन अखिल क्रान्तिकारीको २२ औं राष्ट्रिय सम्मेलन अन्तर्गत आजबाट बन्दसत्र सुरु हुने भएको छ । बबरमहलस्थित कार्की व्यांक्वेटमा मध्याह्न १२ बजेपछि बन्दसत्र सुरु हुने बताइएको छ ।
आजबाट शुरु हुने बन्दसत्रमा विभिन्न समूह बनाएर प्रतिवेदन उपर छलफल गर्ने, प्रत्येक समूहले एक टोली नेता छान्ने, छलफलपछि हलमा टोली नेताले छलफलमा उठेका विषय राख्ने र प्रतिवेदन पारित भएपछि नेतृत्व निर्माणको प्रक्रिया अघि बढाइने बताइएको छ ।
उक्त बन्दसत्रमा पार्टीका नेताहरुको राजनीतिक प्रशिक्षण समेत हुने छ भने, सोहि बन्दसत्रमा अध्यक्ष रञ्जित तामाङले राजनीतिक तथा सांगठनिक प्रतिवेदन पेश गर्ने भएका छन् ।
बिहीबार नै काठमाडौंको कमलादीस्थित प्रज्ञा भवनमा नेकपा माओवादी केन्द्रका अध्यक्ष प्रचण्डले अखिल क्रान्तिकारीको २२ औं राष्ट्रिय सम्मेलन उदघाटन गर्नुभएको थियो ।
आजबाट शुरु हुने बन्दसत्रमा ४० वर्षे उमेर हद लागु हुनुपर्ने मत राखेका उपाध्यक्ष दिपेश पुनले अध्यक्षमा आफ्नो दाबी प्रस्तुत गरेका छन् । उपराष्ट्रपति नन्दबहादुर पुनका कान्छो छोरा हुन् ।
अध्यक्ष पदको दाबेदारमा दिपेश पुन, सुरेन्द्र बस्नेत र पञ्चा सिंह मुख्य दाबेदार रहेको बताइएको छ । उपाध्यक्षहरुमा भने, तिलक भण्डारी, विजय गौतम र महासचिव उत्तम अधिकारी पनि अध्यक्षका आकांक्षी रहेको बताइएको छ ।
