Total views : 295838
काठमाडौं । प्रधानमन्त्री शेरबहादुर देउवा नेतृत्वको सरकारले तीन महिनापछि शुक्रबार मन्त्रिपरिषद्ले पूर्णता पाउने भएको छ ।
बालुवाटारमा हिजो बसेको सत्ता गठबन्धनको बैठकले मन्त्रालय बाँडफाँडको टुंगो लगाएर आज नै मन्त्रिपरिषद्लाई पूर्णता दिने सहमति भएको छ ।
सोहि सहमति अनुसार कांग्रेसलाई प्रधानमन्त्रीसहित ९, माओवादी केन्द्रलाई ५, जसपा र नेकपा एकीकृत समाजवादीले ४–४ मन्त्रालय दिइने बताइएको छ ।
बिहीबारको सहमति बमोजिम आज ११ बजे मन्त्रिपरिषद् विस्तार, ४ बजे मन्त्रिहरुको शपथ हुने प्रधानमन्त्रीको सचिवालयले जानकारी गराएको छ ।
मन्त्रालय भागबण्डामा कांग्रेसले प्रधानमन्त्रीसहित रक्षा, गृह, परराष्ट्र, सञ्चार तथा सूचना प्रविधि, महिला तथा बालबालिका र युवा तथा खेलकुद मन्त्रालय लगाएत पाउने बताइएको छ । यता नेकपा माओवादी केन्द्रले अर्थ, ऊर्जा, शिक्षा, विज्ञान तथा प्रविधि, भूमि व्यवस्था तथा गरिबी निवारण र खानेपानी मन्त्रालय पाएको छ ।
त्यस्तै नेकपा एकीकृत समाजवादी मन्त्रालय भागबण्डामा आफ्नो असन्तुष्टि जनाउदैं दुई राज्यमन्त्रीसहित ४ मन्त्रालय लिने गरी सहमति गरेको छ । उक्त सहमति अनुसार एकीकृत समाजवादीले स्वास्थ्यसहित ४ मन्त्रालय पाएको छ । उसले शहरी विकास, संस्कृति तथा पर्यटन र श्रम तथा रोजगार मन्त्रालय पाएको छ ।
जसपाले भौतिक पुर्वाधार तथा यातायात, कृषि तथा पशुपन्छी, संघीय मामिला तथा सामान्य प्रशासन र बन तथा वातावरण पाउने भएको छ ।
केपी ओली नेतृत्वको सरकारलाई विस्थापित गर्दै गठबन्धनबाट प्रधानमन्त्री बनेका प्रधानमन्त्री शेरबहादुर देउवाले तीन महिना अन्तरालमा समेत सरकार विस्तार गर्न नसक्दा आलोचना खेपिरहेको समयमा अब सरकारले पूर्णता पाउने देखिएको छ ।
