Total views : 344280
काठमाडौं । नेकपा माओवादी केन्द्रको स्थायी समिति बैठक शुरु भएको छ । बिहान साढे ८ बजेबाट पार्टी मुख्यालय पेरिस डाँडामा सांगठनिक विषयमा केन्द्रित रहेर स्थायी कमिटी बैठक भइरहेको छ ।
आज बसिरहेको बैठकमा राष्ट्रिय सम्मेलनलाई लक्षित गरेर पार्टीले कार्तिक १३ गते वडा सम्मेलन गर्ने जनाएको छ । त्यस्तै मङ्सिर ४ गते पालिकाहरुको सम्मेलन गर्ने प्रस्ताव गरिएको छ । बैठकमा देशको वर्तमान राजनीतिक अवस्थाबारे समेत छलफल भइरहेको बताइएको छ ।
स्थायी समिति सदस्यहरुमध्ये अर्थमन्त्री जनार्दन शर्मा, ऊर्जा मन्त्री पम्फा भुसाल, शिक्षा तथा विज्ञान प्रविधि मन्त्री देवेन्द्र पौडेल, प्रवक्ता कृष्णबहादुर महरालगायतको उपस्थिति रहेको छ ।
उक्त बैठकमा स्थायी समिति सदस्यहरुमा मातृकाप्रसाद यादव, हरिबोल गजुरेल, गिरिराजमणि पोखरेल, लीलामणि पोखरेल, शक्ति बस्नेत, नारायणकाजी श्रेष्ठलगायत सबैजसोको उपस्थिति रहेको बताईएको छ । पार्टी कार्यालय पेरिसडाँडामा जारी बैठक पुस ११ देखि १३ गतेसम्म हुने पार्टीको राष्ट्रिय सम्मेलनमा केन्द्रित रहने माओवादी केन्द्रले जानकारी गराएको छ ।
प्रदेश नम्बर १ र बागमती प्रदेशमा सरकार परिवर्तनसँगै कर्णाली प्रदेशमा समेत आफ्नो पार्टीले पाएको मुख्यमन्त्री हेरफेरबारे बैठकमा छलफल हुने जनाइएको छ।
