Total views : 347603
एजेन्सी । पाकिस्तानको दक्षिणी बालुचिस्तान प्रान्तमा बिहीबार आएको शक्तिशाली भूकम्पमा कम्तीमा बीसजनाको ज्यान गएको सरकारी अधिकारीहरूले बीबीसीलाई जानकारी गराएका छन् ।
कम गहिराईमा केन्द्रविन्दु भएर आउने भूकम्पले धेरै क्षति पुर्याउने भएकाले भौतिक धेरै पूर्वाधार तहसनहस भएको छ, भने मृतकको संख्या बढ्नसक्ने समेत बताइएको छ । यता अन्तर्राष्ट्रिय समाचार निकाय रोयटर्सकाअनुसार मारिनेमा अधिकांश महिला तथा बालबालिका रहेको बताएको छ ।
अमेरिकी भौगर्भिक सर्वेक्षणअनुसार ५ दशमलव ९ रेक्टरस्केलको सो भूकम्पको केन्द्रविन्दु जमिनको सतहभन्दा ९ किलोमिटरमुनि रहेको बताइएको छ ।
स्थानीय अधिकारीहरूले बीबीसी उर्दूलाई कम्तीमा १ सय अन्य घाइते भएको तथा तिनीहरूमध्ये धेरैलाई चिन्ताजनक अवस्थामा अस्पताल लगिएको बताएको छ । उद्धार कार्य जारी रहेको तथा सैनिक डाक्टर तथा अन्य स्वास्थ्यकर्मी पनि
घटनास्थलमा सेवामा जुटिरहेको स्थानीय सञ्चार माध्यमले जानकारी गराएको छ ।
भूकम्पका कारण २ सय भन्दाबढी माटोले बनेका घरहरू भत्किएका छन् भने थुप्रै पक्की भवन पनि क्षतिग्रस्त भएको बताइएको छ ।
ट्विटरमार्फत समवेदना प्रकट गर्दै पाकिस्तानका प्रधानमन्त्री इमरान खानले बालुचिस्तानको हारनाइमा भूकम्प पीडितलाई तत्काल सहयोग, राहत र क्षतिपूर्ति उपलब्ध गराउन सम्बन्धित सबै पक्षलाई निर्देशन समेत दिएका छन् ।
